Հայկական կողմն առանց մաքսային ստուգումների ճանապարհ չի տրամադրի Ադրբեջանին.վարչապետ

Հայկական կողմը որևէ պարագայում չի համաձայնի առանց մաքսային ստուգումների և մաքսային տուրքի գանձման ճանապարհ տրամադրել Ադրբեջանին, ասել է ՀՀ վարչապետ Նիկոլ Փաշինյանը՝  անդրադառնալով հաղորդակցության ուղիների վերաբացմանը։

«Ճանապարհների հարցը կուզեի բաժանենք մի քանի մասի։ Առաջինը իրավական կարգավորումների խնդիրն է։ Եթե մենք իրավական կարգավորումների խնդրով գալիս ենք համաձայնության, մնացած հարցերը դառնում են տեխնիկական։ Եռակողմ հայտարարության մեջ արձանագրված է, որ պետք է ճանապարհ լինի Ադրբեջանի արևմտյան շրջանները Նախիջևանի հետ կապող, բայց ուզում եմ, որ դիտանկյունը փոխենք, որովհետև սա տեղի է ունենում տարածաշրջանային կոմունիկացիաների բացման տրամաբանության մեջ։

Մեր ընկալմամբ՝ սա ոչ միայն ուղղակի ճանապարհ է Ադրբեջանի արևմտյան հատվածները Նախիջևանի հետ կապող, այլև սա նոր, միջազգային տարանցիկ ճանապարհ  է, որի բացմամբ հետաքրքրված է նաև Հայաստանը։

Հետևաբար, երբ համաձայնության գանք Ադրբեջանի հետ իմ նշած հարցերի շուրջ, մենք պետք է նաև մեր դիտակետն այն տրամաբանությամբ վերանայենք, որ պիտի ունենանք մեր տեսանկյունից մի ճանապարհ, որը հնարավորինս գրավիչ կլինի միջազգային տարանցիկ բեռնափոխադրումների համար, որովհետև դա Հայաստանին կբերի կոնկրետ օգուտներ։

Այս համատեքստում է, որ մենք չենք բացառել ու չենք բացառում նոր ճանապարհի կառուցումը, որը, մեր տեսանկյունից, կլինի միջազգային հաղորդակցության կարևոր ուղի: Մեր նպատակադրումն է՝ մեր ունեցած «Հյուսիս-հարավ» նախագիծն իր բովանդակության և էության մեջ ընդլայնել և այն դարձնել ոչ միայն Հյուսիս-Հարավ, այլև Արևելք-Արևմուտք, այսինքն՝ մոտավորապես խաչաձև ճանապարհ, որն էականորեն կմեծացնի այդ ճանապարհի նշանակությունը»,- ասել է Նիկոլ Փաշինյանը։

Պատասխանելով հարցին, թե որոնք են Հայաստանի «կարմիր գծերը», վարչապետն ասել է․

«Բրյուսելյան հանդիպումից առաջ ես արդեն իմ ֆեյսբուքյան էջում գծանշել էի հայկական կողմի կարմիր գծերը, որի իմաստը հետևյալն է, որ միջանցքային որևէ տրամաբանություն մենք չենք ընդունում և այն, ինչ-որ պայմանավորվեցինք կամ խոսեցինք երկաթուղիների մասով Բրյուսելում, Սոչիում սկսված խոսակցության ամփոփումն էր, և այնտեղ արձանագրումը հետևյալն է, որ երկու կողմերից կգործի մաքսային և սահմանային հսկողություն, որը մեզ համար ընդունելի է, Ադրբեջանի համար ընդունելի է և մենք հիմա պայմանավորվեցինք գործարկել երկաթուղու շինարարությունը»,-ասել է Փաշինյանը:

Նա վստահեցրել է, որ ավտոճանապարհների հետ կապված հայկական կողմի սկզբունքային դիրքորոշումը մնացել է նույնը:

Պատասխանելով քաղաքացիների անվտանգության երաշխիքների մասին հարցին՝ Նիկոլ Փաշինյանը նշել է, որ ուղեկցումները հնարավոր տարբերակներից մեկն է։