Հայոց ցեղասպանության կազմակերպիչներից վրեժ լուծած հերոս հայորդիների հիշատակը հավերժացնող հուշակոթող կտեղադրվի

Երեւանի ավագանին միաձայն կողմ քվեարկեց Ազգային արժանապատվության ասպետներին նվիրված աղբյուր-հուշակոթող տեղադրելու նախագծին:

Հայոց ցեղասպանության վրիժառուների ժառանգների՝ Արտյոմ Երկանյանի ու Արմեն Գեւորգյանի կողմից ներկայացվել է միջնորդություն՝ Երեւան քաղաքում տեղադրել Հայոց ցեղասպանության կազմակերպիչներից վրեժ լուծած հերոս հայորդիների հիշատակը հավերժացնող խորհրդանշական հուշակոթող:

Աղբյուր-հուշակոթողը նախատեսվում է տեղադրել Երեւան քաղաքի Օղակաձեւ զբոսայգու չորրորդ հատվածում՝ Ալեք Մանուկյան փողոցի եւ Տ. Պետրոսյանի անվան շախմատի տան ետնամասին հարող կանաչապատ տարածքի կենտրոնական մասում:

Ավագանու այսօրվա նիստին ներկա էին նաեւ վրիժառուների ժառանգները՝ լրագրող Արտյոմ Երկանյանն ու Արմեն Գեւորգյանը:

Արտյոմ Երկանյանը շնորհակալություն հայտնեց ներկաներին՝ կարեւոր շեշտադրումները ճիշտ ընկալելու համար:

«Սա արդարադատության, արժանապատվության եւ պատժի անխուսափելիության խորհրդանիշ պիտի լինի: Սա նաեւ հուշում պիտի լինի բոլոր նրանց, ովքեր այսօր են շարունակում մարդկության դեմ հանցանքներ կատարել՝ հույս ունենալով, որ կարողանալու են խուսափել պատժից: Կարծում եմ՝ սա լինելու է աշխարհում միակ հուշարձանը, որը հիշեցնելու է ազգասպաններին, ցեղասպաններին, որ հնարավոր չի լինելու խուսափել պատժից»,- ասաց Երկանյանը:

Նա նաեւ կարծիք հայտնեց, որ կգա ժամանակ, երբ հուշարձանը կդառնա հայերի ու թուրքերի հաշտեցման խորհրդանիշ՝ մանրամասնելով. «Եկեք հիշենք, որ աշխարհում առաջին պետությունը, որը պաշտոնապես ճանաչել եւ դատապարտել էր Հայոց ցեղասպանությունը, Թուրքիան էր, որի օրինական տրիբունալը մահապատժի էր դատապարտել այն անձանց, որոնց պատժեցին մեր նախնիները՝ Արմենի պապը, իմ նախնին…: Այսինքն՝ նրանք իրականացրել էին թուրքական օրինական ատյանի օրինական վճիռը: Դրա համար կարող եմ ասել, որ դուք այսօր որոշում եք կայացնում եւս մեկ անգամ հարգել մարդկանց, որոնք երբեւէ ոչ մի դեպքում աշխարհում չեն կարող ընկալվել որպես մարդասպան կամ ահաբեկիչ»: