Մեծ Բրիտանիայում հայտնաբերել են սունկ, որը կարող է սարդերին «զոմբի» դարձնել։ Այս մասին հայտնում է The Byte պարբերականը։ Սունկն առաջին անգամ նկատվել է Հյուսիսային Իռլանդիայում՝ հեռուստաշոուի նկարահանումների ժամանակ. այն աճում էր Էսփի ամրոցի վառոդի նկուղում։ Նրան տվել են Gibellula attenboroughii անվանումը։
Մասնագետները պարզել են, որ այս սնկի սպորները կարող են վարակել տեղանքում ապրող քարանձավային սարդերին։ Վարակված սարդի վարքագիծը ամբողջությամբ փոխվում է. այդ պահից սկսած նա հոգում է միայն մեկ բանի մասին՝ վարակը տարածելու։ Սունկը «զոմբիացված» սարդին ստիպում է դուրս գալ ստորգետնյա տարածքներից և շարժվել բաց տարածություն։ Հասնելով անհրաժեշտ վայր՝ այն արտադրում է նեյրոտոքսին, սպանում սարդին ու պահպանում նրա մնացորդները։ Դրանից հետո սունկը սկսում է աստիճանաբար դուրս քաշել սննդարար նյութերը, աճել և տարածել նոր սպորներ։ Դրանք վարակում են այլ սարդերին, և ցիկլը կրկնվում է։
Բացահայտումն անդրադարձել է Fungal Systematics and Evolution գիտական ամսագիրը։ Հոդվածի հեղինակներից մեկը՝ միկոլոգ Հարրի Էվանսը, կարծում է, որ Gibellula attenboroughii սունկը կարող է լայն կիրառություն գտնել բժշկության մեջ, մասնավորապես՝ հակաբիոտիկների արտադրության համար։ Գոյություն ունեն սնկերի բազմաթիվ տեսակներ, որոնք դեռ պետք է հայտնաբերել։ Ենթադրվում է, որ սնկերի թագավորությունը ներառում է 10-20 միլիոն տեսակ՝ դարձնելով այն բնության ամենամեծ թագավորությունը։ Սակայն այս տեսակների միայն 1 տոկոսն է մինչ այժմ նկարագրվել գիտնականների կողմից։ Ավելի վաղ հաղորդվել էր, որ ԱՄՆ-ի Յելոուսթոուն ազգային պարկում հայտնաբերվել է առաջին եղնիկը, որը վարակվել է հիվանդությամբ, որը կենդանիներին «զոմբիի» է վերածում։ Մասնագետները զգուշացնում են, որ հիվանդությունը կարող է տարածվել նաև մարդկանց շրջանում։