Հայտնաբերվել է «օմիկրոն» շտամով վարակվածության ևս 7 դեպք

Հայաստանում իրականացվող ՊՇՌ դրական պացիենտների նմուշների մոլեկուլյար-գենետիկ հետազոտությունների արդյունքում հայտնաբերվել է «օմիկրոն» շտամով վարակվածության ևս 7 դեպք:

Այս մասին տեղեկացնում են Հիվանդությունների վերահսկման և կանխարգելման Ազգային կենտրոնից:

Նմուշները վերցվում են ընտրանքային՝ կրկնակի ՊՇՌ դրական արդյունքով պացիենտներից, կորոնավիրուսային հիվանդությամբ պացիենտներից, օդային սահմանով երկիր մուտք գործած դրական ՊՇՌ լաբորատոր հետազոտության պատասխան ունեցող անձանցից:

Հաշվի առնելով համաճարակային իրավիճակը՝ առողջապահության նախարարությունը ևս մեկ անգամ կոչ է անում շարունակել պահպանել հակահամաճարակային կանոնները և պատվաստվել, քանի որ պարբերաբար ի հայտ եկող նոր շտամերի, մասնավորապես «օմիկրոնի» համատեքստում, հատկապես կարևորվում են պատվաստումները, այդ թվում՝ խթանիչ դեղաչափերով։

ԱՆ հիվանդությունների վերահսկման և կանխարգելման ազգային կենտրոնը համագործակցում է Գիտությունների ազգային ակադեմիայի մոլեկուլային կենսաբանության ինստիտուտի և Հայ-Ռուսական համալսարանի հետ: