Հայ օլիմպիականների մարզիչներն ուզում են դիմել սպորտային դատարան

Հունահռոմեական ոճի Հայաստանի ըմբշամարտի հավաքականի գլխավոր մարզիչ Էդուարդ Սահակյանն ու մարզիչ Գևորգ Ալեքսանյանն այսօր կայացած ասուլիսում ևս մեկ անգամ հաստատեցին, որ Տոկիոյի օլիմպիական խաղերում հայ ըմբիշների նկատմամբ մրցավարական արտառոց որոշումներն անհաղթահարելի արգելք են հանդիսացել մեդալների համար պայքարում։

Նշենք, որ Տոկիոյի օլիմպիական հունահռոմեական ոճի ըմբշամարտի մրցումներին Հայաստանի հավաքականը ներկայացված էր չորս ըմբիշով` Արթուր Ալեքսանյանը, Կարապետ Չալյանը, Արմեն Մելիքյանը և Կարեն Ասլանյանը։

Մեր մարզիչները ընդգծեցին, որ ըմբիշներից դժգոհելու տեղ չունեն, և բոլորն էլ գորգի վրա արել են` ինչ հնարավոր էր։ Մասնավորապես, Արմեն Մելիքյանը հաղթական գոտեմարտից հետո առողջական խնդիրներ, իսկ երկրորդ գոտեմարտից առաջ սրտխառնոց և փսխում է ունեցել, նոր դուրս եկել գորգ։ Այդ պատճառով էլ չի կարողացել հասնել իր նպատակին, չնայած շատ լավ պատրաստ էր ու մեդալի իրական հավակնորդ էր։

Իսկ ահա մեր մյուս ըմբիշները` Կարեն Ասլանյանը, Կարապետ Չալյանը և Արթուր Ալեքսանյանը, ըստ մեր մարզիչների դարձել են մրցավարության «զոհ»։

«Իմ մարզչական կարիերայի ընթացքում ես չէի տեսել մի գոտեմարտ, որի ընթացքում գորգի մրցավարները և գոտեմարտի գլխավոր մրցավարը ֆիքսում են մաքուր հաղթանակը, դահլիճում հնչում է հաղթողի անունը, հետո որոշումը փոխվում է», – նշեց Գևորգ Ալեքսանյանը։

Բայց հենց այսպես վարվեցին 67 կգ քաշային Կարեն Ասլանյանի նկատմամբ, որը պարզապես զրկվեց մեդալի համար պայքարից։ Մրցավարական ամենաթողությունը մեր ըմբիշների նկատմամբ այսքանով չվերջացավ։ Կարապետ Չալյանին զրկեցին բրոնզե մեդալից, իսկ Արթուր Ալեքսանյանին`ոսկե։

«Արթուրը մրցանակաբաշխության ժամանակ չկրեց արծաթե մեդալը, բայց նշեմ, որ դա մեծ նվաճում է, որը երազում են շատ մարզիկներ։ Ուղղակի այդ մեդալը կարող էր ու կլիներ այլ հարգի, եթե մեր ըմբիշին չխանգարեին»,– ասեց Գևորգ Ալեքսանյանը։

Հունահռոմեական ոճի Հայաստանի հավաքականի մարզիչները պատրաստվում են Հայաստանի ըմբշամարտի ֆեդերացիայի և Հայաստանի օլիմպիական կոմիտեի հետ համատեղ որոշում կայացնել սպորտային դատարան դիմելու համար։

«Եթե մենք դիմենք սպորտային դատարան, ու նույնիսկ այնտեղ էլ պարտվենք, գոնե կիմանանք, որ արդարությունը վերականգնելու բոլոր փորձերը արել ենք։ Օլիմպիական խաղերում նման մրցավարությունն անթույլատրելի։ Յուրաքանչյուր մարզիկ նախապատրաստվում է այս մրցումներին առնվազն չորս տարի, ու մեկ որոշմամբ ամեն ինչ ջուրն են լցնում»,– ասացին մեր մարզիչները։