ԱՄՆ նախագահ Դոնալդ Թրամփն անդրադարձել է իրանա-իսրայելական հակամարտությանը՝ նշելով, որ ինքն Իրանին գործարք կնքելու հնարավորություն էր տվել։
«Ես Իրանին համաձայնագիր կնքելու բազմաթիվ հնարավորություններ տվեցի։ Ես ամենակոշտ խոսքերով ասացի նրանց՝ «պարզապես արեք դա», բայց, որքան էլ նրանք ջանացին, որքան էլ մոտեցան, չկարողացան իրականացնել։
Ես զգուշացրի, որ հետևանքները կլինեն շատ ավելի վատ, քան նրանք կարող են պատկերացնել կամ ակնկալել, որ Միացյալ Նահանգներն ունի աշխարհի ամենաորակյալ և մահաբեր ռազմական սպառազինությունը, Իսրայելը՝ ևս, և գիտի՝ ինչպես օգտագործել։
Իրանի՝ որոշ կոշտ դիրքորոշում ունեցող գործիչներ խիզախ խոսքեր էին ասում, բայց նրանք չգիտեին՝ ինչ է սպասվում։
Հիմա նրանք բոլորը զոհված են, և վիճակը միայն կվատանա։
Արդեն եղել է մեծ արյունահեղություն և ավերածություն, բայց դեռ ժամանակ կա՝ կանխելու այս կոտորածը, քանզի հաջորդ՝ ավելի դաժան հարձակումներն արդեն պլանավորված են։ Իրանը պետք է համաձայնագիր կնքի, որպեսզի փրկի այն, ինչ ժամանակին հայտնի էր որպես Իրանական կայսրություն։ Ոչ մի նոր մահ, ոչ մի նոր ավերածություն։ Պարզապես արեք դա, քանի ուշ չէ։ Թող Աստված օրհնի ձեզ բոլորիդ»,- գրել է Թրամփը սոցցանցի իր էջում։