Արծաթե դրամներ՝ Կիլիկիայի հայկական թագավորության ժամանակաշրջանից։
Դրամների դիմերեսին պատկերված են թագակիր Զաբելը՝ ձախից, և թագակիր Հեթումը՝ աջից։ Թագուհին՝ մեկ ձեռքով, թագավորը՝ երկուսով, պահում են խաչը։ Շուրջը հայերեն գրություն է՝ երկու կետավոր շրջանակների միջև։ Դրամների դարձերեսին պատկերված է խաչ կրող առյուծ։
Երկար տարիների ընթացքում թողարկված դրամների այս տարբերակում տեղի են ունեցել պատկերագրական և ոճական փոփոխություններ թագուհու և թագավորի զգեստավորման մեջ, գլուխների պատկերներում։
Հեթում I թագավորի բազմազան դրամների շարքում ամենաառատն ու երկարատև թողարկվածը Զաբել թագուհու և Հեթումի պատկերով արծաթե դրամներն են։
Հեթում-Զաբել արծաթե դրամների և կես դրամների վրա չի նշվել ո′չ թողարկման վայրը, ո′չ էլ տարեթիվը։ Վերոնշյալ դրամների թողարկումը ամենայն հավանականությամբ սկսվել է 1246 թ. և տևել շուրջ 25 տարի։
Ցուցանմուշը կարող եք տեսնել «Կիլիկիոյ Հայոց թագավորութիւն․ կարողութեամբն Աստուծոյ» խորագիրը կրող մշտական ցուցադրության սրահում