ՀՀ պետական եկամուտների կոմիտեն այսօր հրապարակել է Հայաստանի 1000 խոշոր հարկատուների ցանկը

2019 թվականի երկրորդ եռամսյակի արդյունքներով՝ ՀՀ պետական եկամուտների կոմիտեն այսօր հրապարակել է Հայաստանի 1000 խոշոր հարկատուների ցանկը:

Այսպիսով՝ հանրապետության 1000 խոշոր հարկատու ընկերությունները միասին այս տարվա հունվար-հունիս ամիսներին պետբյուջե են վճարել 492 մլրդ 668 մլն 865 հազար դրամի հարկեր եւ տուրքեր նախորդ տարվա նույն ժամանակահատվածի 511 մլրդ 33 մլն 906 հազար դրամի դիմաց: Ստացվում է, որ խոշոր հարկատուների վճարած հարկերը 2020-ի երկրորդ եռամսյակում նախորդ տարվա նույն ժամանակահատվածի համեմատ նվազել են 18 մլրդ 365 մլն 41 հազար դրամով կամ շուրջ 3.6%-ով։

ՊԵԿ-ը 2020 թվականի առաջին եռամսյակի ընթացքում պետական բյուջե է հավաքել 680.3 մլրդ դրամ։ Միայն 1000 խոշոր հարկատուները ապահովել են ընդհանուր հարկերի 72.4 տոկոսը։

2020 թվականի հունվար-հունիս ամիսների դրությամբ 1000 խոշոր հարկատուների ցուցակը գլխավորում է «Գրանդ տոբակո» ընկերությունը 26 մլրդ 339 մլն 387 հազար դրամ հարկերով։ Նախորդ տարվա նույն ժամանակահատվածի համեմատ ընկերության վճարած հարկերը նվազել են 1 մլրդ 942 մլն 17 հազար դրամով կամ 6.87 տոկոսով։ 2019-ի առաջին կիսամյակում ընկերությունը վճարել էր 28 մլրդ 281 մլն 404 հազար դրամ հարկեր։

Երկրորդ խոշոր հարկատուն «Գազպրոմ Արմենիա» ընկերությունն է՝ վճարած 25 մլրդ 978 մլն 780 հազար դրամ հարկերով։ 2019-ի առաջին կիսամյակում ընկերությունը վճարել էր 22 մլրդ 794 մլն 377 հազար դրամ հարկ: Ստացվում է, որ այս դեպքում արդեն ընկերության վճարած հարկերն ավելացել են 3 մլրդ 184 մլն 403 հազար դրամով կամ շուրջ 14 տոկոսով։

2019-ի առաջին կիսամյակի առաջատարը՝ «Զանգեզուրի պղնձամոլիբդենային կոմբինատ»-ը, այս անգամ հանգրվանել է 3-րդ տեղում։ 2020-ի հունվար-հունիս ամիսներին ընկերությունը վճարել է 21 մլրդ 629 մլն 546 հազար դրամ հարկեր։ 2019-ի նույն ժամանակահատվածում ընկերությունը վճարել է 29 մլրդ 504 մլն 850 հազար դրամ հարկեր, այսինքն՝ ԶՊՄԿ-ի վճարած հարկերը նվազել են 7 մլրդ 875 մլն 304 հազար դրամով կամ շուրջ 26.7 տոկոսով:

4-րդ խոշոր հարկատուն «Գեոպրոմայնինգ գոլդ» ընկերությունն է՝ վճարած 12 մլրդ 771 մլն 18 հազար դրամ հարկերով։ Ընկերությունը 2019-ի առաջին կիսամյակում վճարել էր 9 մլրդ 127 մլն 544 հազար դրամ հարկեր։ Ստացվում է, որ նրանց վճարած հարկերն աճել են 3 մլրդ 643 մլն 474 հազար դրամով կամ շուրջ 40 տոկոսով։

Դրան հաջորդում է «Սիփիէս Օիլ» ընկերությունը՝ վճարած 9 մլրդ 678 մլն 792 հազար դրամ հարկերով։ Ընկերությունը 2019-ի հունվար-հունիսին վճարել էր 5 մլրդ 122 մլն 286 հազար դրամ հարկեր, այսինքն՝ վճարված հարկերն աճել են 4 մլրդ 556 մլն 506 հազար դրամով կամ շուրջ 89 տոկոսով։ Այստեղ հարկ է նշել, որ նախորդ տարի «Սիփիէս Օիլ»-ից բացի, կար նաեւ «Սիփիէս Օիլ Քորփորեյշն» ընկերությունը, որը վճարել էր 4 մլրդ 36 մլն 369 հազար դրամ հարկեր։

2020-ի առաջին կիսամյակում 6-րդ խոշոր հարկատուն «Ինտերնեյշնլ Մասիս Տաբակ» ընկերությունն է՝ վճարած 9 մլրդ 571 մլն 58 հազար դրամ հարկերով։ Նախորդ տարվա նույն ժամանակահատվածում ընկերությունը վճարել էր 9 մլրդ 455 մլն 82 հազար դրամ հարկեր, այսինքն՝ ընկերության վճարած հարկերն աճել են 115 մլն 976 հազար դրամով կամ շուրջ 1.2 տոկոսով:

7-րդ խոշոր հարկատուն Բարսեղ Բեգլարյանին պատկանող «Ֆլեշ» ընկերությունն է՝ վճարած 8 մլրդ 11 մլն 564 հազար դրամ հարկերով։ 2019-ի հունվար-հունիսին ընկերությունը վճարել էր 7 մլրդ 601 մլն 578 հազար դրամ հարկեր: Ստացվում է, որ Բեգլարյանի ընկերության վճարած հարկերն ավելացել են 409 մլն 986 հազար դրամով կամ շուրջ 5.4 տոկոսով։

8-րդ խոշոր հարկատուն «Ֆիլիպ Մորրիս Արմենիա» ընկերությունն է՝ վճարած 6 մլրդ 946 մլն 388 հազար դրամ հարկերով։ 2019-ի հունվար-հունիսին ընկերությունը վճարել էր 5 մլրդ 180 մլն 170 հազար դրամ հարկեր: Ստացվում է, որ ընկերության վճարած հարկերն ավելացել են շուրջ 1 մլրդ 766 մլն 218 հազար դրամով կամ 34.1 տոկոսով:

9-րդ խոշոր հարկատուն «Հայաստանի էլեկտրական ցանցեր» ընկերությունն է՝ վճարած 6 մլրդ 936 մլն 581 հազար դրամ հարկերով։ 2019-ի նույն ժամանակահատվածում ընկերությունը վճարել էր 7 մլրդ 793 մլն 184 հազար դրամ հարկեր, այսինքն՝ ՀԷՑ-ի վճարած հարկերը նույնպես նվազել են 856 մլն 603 հազար դրամով կամ շուրջ 11 տոկոսով:

Խոշոր հարկատուների տասնյակը եզրափակում է «ՄՏՍ-Հայաստան» ընկերությունը՝ վճարած 6 մլրդ 889 մլն 228 հազար դրամ հարկերով: Նախորդ տարվա նույն ժամանակահատվածում ընկերությունը վճարել էր 2 մլրդ 301 մլն 892 հազար դրամ հարկեր, այսինքն՝ ընկերության վճարած հարկերն ավելացել են գրեթե 3 անգամ։