ՀՀ օդային տարածքը երբևէ փակ չի եղել որևէ մեկի համար, իսկ Նախիջևան իրենք միշտ էլ թռչել են ՀՀ տարածքով.Քաղավիացիայի վարչության նախկին պետ

Օրերս սկսեցին տարածվել լուրեր, որ Հայաստանը Ադրբեջանի համար բացել է իր օդային տարածքը, օդային միջանցք է տրամադրել Ադրբեջանին և այլն։ Խոսակցությունները տարածվեցին այն բանից հետո, երբ ադրբեջանական քաղաքացիական ինքնաթիռը երեկ Նախիջևանից Հայաստանի օդային տարածքով ուղևորվեց Ադրբեջան։  

Իրավիճակի մասին Civic.am-ը  փորձել է պարզաբանումներ ստանալ Քաղաքացիական ավիացիայի վարչության նախկին պետ Շահեն Պետրոսյանից: Նա նշել է, որ Հայաստանի օդային տարածքը երբևէ փակ չի եղել ոչ մեկի համար։ «Փակ է եղել Թուրքիայի օդային տարածքը Հայաստանի համար, իսկ դա եղել է մեր տգիտության պատճառով։ Երբ մենք անկախացանք, օդային սահմանը Սովետական Միությանն էր։ Այն ժամանակ ավիացիոն ղեկավարությունը ուշադրություն չդարձրեց օդային սահմանին, և Թուրքիան օգտվեց առիթից՝ ասելով, որ Սովետական Միությունն այլևս գոյություն չունի, էս օդային սահմանը փակ է։ Հետո երբ մենք իմացանք, արդեն ես էի վարչության պետը, մենք ձեռնամուխ եղանք այդ օդային բլոկադան վերացնելուն, և մեզ Եվրոպայի, մասնավորապես Ավստրիայի օգնությամբ հաջողվեց։ Եվրոպան մեզ այդ գործում շատ աջակցեց։ Դրանից հետո օդային որևէ փակ սահման չի եղել քաղաքացիական ավիացիայի համար։ Դա IKAO-ի առաջին կետն է, որ օդը ոչ մեկին չի պատկանում, ոչ մեկի սեփականությունը չէ՝ ինչ-որ բարձրությունից սկսած։ Որոշակի բարձրությունից հետո օդը բոլորինն է»,- ասել է Շահեն Պետրոսյանը։

Շահեն Պետրոսյանը նշել է նաև, որ Արցախի օդային տարածքը փակ է եղել, որովհետև այնտեղ ռազմական գործողություններ են ընթացել։ «Դա, իմիջիայլոց, Ադրբեջանն է փակել, համարելով իր տարածքը՝ փակել է։ Իսկ Նախիջևան իրենք միշտ էլ թռչել են՝ Բաքու-Նախիջևան կամ Գյանջա-Նախիջևան,  իրենք միշտ էլ մեր Հայաստանի տարածքով են թռչել։ Օդային տարածք փակելը միջազգային սկանդալի կբերի»,- ասել է Շահեն Պետրոսյանը։