Հնարավոր է ԱՄՆ-ն Հայաստանին նվիրաբերի «Մոդեռնա»․Նուբար Աֆեյան

Վերջին մի քանի օրերի ընթացքում աշխատում ենք, որպեսզի Ամերիկայի Միացյալ Նահանգները Հայաստանին և տարածաշրջանին կարողանա նվերի տեսքով տրամադրել կորոնավիրուսի դեմ ամերիկյան պատվաստանյութը: Այս մասին այսօր Երևանի պետական բժշկական համալսարանի անձնակազմի հետ հանդիպման ժամանակ նշեց «Մոդեռնա» ընկերության համահիմնադիր Նուբար Աֆեյանը:

Ըստ նրա՝ որպես նվեր Հայաստանին կտրամադրվի «Մոդեռնան» կամ «Պֆայզրը», իսկ թե երբ պատվաստանյութերը կլինեն Հայաստանում, Աֆեյանի խոսքով հստակ ժամկետ նշել չեն կարող. «Դա կառավարության որոշումն է, բոլոր կառավարությունները, այդ թվում Հայաստանի պետք է  համագործակցեն միմյանց հետ: Որևէ այլ տարբերակ չկա Պֆայզրն ու Մոդեռնան գնելու:  Որպես բարեգործությամբ զբաղվող՝ կարող եմ ասել, որ ոչ ոք չի կարող պատվաստանյութ ձեռք բերել և նվիրաբերել ուրիշին, դա ապօրինի գործունեություն կլինի։ Պատվաստանյութ գնելը զենք գնելու պես բան է, կառավարությունը պետք է ասի՝ իրավունք ունես գնելու, թե՝ ոչ»,- ասաց նա:

Մեր հարցին՝ Աֆեյանը պատվաստանյութը Հայաստան ներկրելու հարցը քննարկե՞լ է նաև Հայաստանի վարչապետի պաշտոնակատար Նիկոլ Փաշինյանի հետ, ում հետ վերջերս հանդիպել էր, Աֆեյանը պատասխանեց, որ հանդիպման ընթացքում վարչապետի պաշտոնակատարի հետ պատվաստանյութի վերաբերյալ խոսակցություն ունեցել է, բայց մանրամասնել թե ինչ՝ չի կարող:

Իսկ պատվաստանյութը ձեռք բերելու համար արդյո?ք հնարավոր է, որ դրա գնի հետ կապված փոփոխություն լինի, այսինքն՝ գնային առումով այն ավելի մատչելի դառնա, թե Հայաստանի, թե այն բոլոր երկրների համար, ովքեր ցանկանում են կորոնավիրուսի դեմ իրենց բնակչությանը պատվաստել նաև Մոդեռնայով: Աֆեյանը պատասխանել է, որ նման բան առաջիկայում սպասվում է: Թե որքան կարժենա նա չմանրամասնեց,պաշտոնապես չի հրապարակվում նաև մեկ դեղաչափի այս պահին գործող գինը: Պատվաստանյութ արտադրող ընկերությունները հաճախ չեն բացահայտում իրենց պատվաստանյութերի գնային արժեքը, սակայն, ըստ որոշ տեղեկությունների, Մոդեռնայի մեկ դեղաչափը դեռևս արժե 24 դոլար: