Ծանրամարտի Եվրոպայի չեմպիոն, արծաթե և կրկնակի բրոնզե մեդալակիր Հռիփսիմե Խուրշուդյանն այսուհետև նաև մրցավարական գործունեություն կծավալի։ Արմենպրես»-ի հետ զրույցում այս մասին ասել է Խուրշուդյանը։«Մրցավար աշխատելու գաղափարը վաղուց ունեի, դեռևս այն ժամանակ, երբ գործող մարզիկ էի: Հայաստանի առաջնությունում, երբ ընթանում էր պատանիների կամ երիտասարդների մրցաշարը, ինքս էի ուզում մրցավար լինել: Եվ հիմա էլ այսպես է ստացվում՝ սպորտից հետո էլ մնում եմ սպորտում»,- նշել է նա: Վերջինիս խոսքով՝ այժմ պաշտոնապես ստացել է «Ազգային մրցավար»-ի կոչում, և Հայաստանի ծանրամարտի ֆեդերացիան հայտ է ներկայացրել միջազգային կառույցին՝ միջազգային կարգի մրցավարի կոչման համար:
«Հայաստանում չունենք կին մրցավար, և ես շատ ուրախ եմ, որ կրկին առաջինն եմ լինելու: Միջազգային կարգի մրցավարի կոչման համար միջազգային ֆեդերացիայի կողմից «քննական» մրցաշարում կլինեմ որպես մրցավար, որից հետո արդեն ըստ տարիքային խմբերի պետք է սկսվի գործունեությունս: 25 տարի լինելով ծանրամարտում՝ գիտեմ նաև, թե ինչպես է լինում այս ամբողջ գործընթացը»,- առանձնացրել է նա: