Հրաչյա Սարգսյանը՝ Երևանի քաղաքապետ

Երեւանի ավագանին այսօր՝ դեկտեմբերի 22-ին արտահերթ նիստ էր հրավիրել, որի օրակարգում միայն մեկ հարց էր՝ «Երևանի քաղաքապետ Հայկ Մարությանին անվստահություն հայտնելու մասին» Երևան քաղաքի ավագանու որոշման նախագիծը: Նախագծով առաջարկվում է Երևանի քաղաքապետ ընտրել փոխքաղաքապետ Հրաչյա Սարգսյանին:
Հաշվիչ հանձնաժողովի անդամ Անի Խաչատրյանը տեղեկացրեց, որ քվեաթերթիկին գրված է Հրաչյա Սարգսյան՝ կողմ և դեմ:
Քվեարկությունը տևեց կես ժամ, որից հետո ներկայացվեցին արդյունքները:
«Իմ քայլ»-ի ավագանու անդամ Մարատ Թոխյանը հայտարարեց, որ ժամանակավոր հաշվիչ հանձնաժողովը հիմք ընդունելով քվեարկության արդյունքները՝ արձանագրել է, որ քվեարկությանը մասնակցել է 57 հոգի:
Անվավեր ճանաչված քվեաթերթիկների թիվը երեքն է, կողմ է քվեարկել 44-ը, դեմ՝ 10:
Նախագիծը ստացավ դրական արդյունք և Հրաչյա Սարգսյանն ընտրվեց քաղաքապետ:
Հրաչյա Սարգսյանը շնորհակալություն հայտնեց Հայկ Մարությանին՝ համատեղ աշխատանք իրականացնելու համար, սկսել են տարբեր բարեփոխումներ՝ տարբեր ոլորտներում:
«Այն բարեփոխումները, որ սկսել ենք և ընթացքի մեջ են՝ շարունակելու ենք, գրանցելու ենք նորանոր հաջողություններ՝, որպեսզի կարողանանք Երևանի բնակիչներին ապահովել պատշաճ միջավայր՝ բնակվելու համար:Շնորհակալություն՝ ինձ վստահություն հայտնելու համար: կարծում եմ՝ այս երկու տարիների ընթացքում հնարավորություն կունենամ իրագործելու այն բոլոր ծրագրերը, որոնք ներառել ենք քաղաքական ծրագրում»,-խոսքում նշեց Հրաչյա Սարգսյանը: