ՀՖՖ-ն և ֆուտբոլիստները ներողություն են խնդրել խոշոր պարտության համար

Հայաստանի ֆուտբոլի ֆեդերացիան, ազգային հավաքականի մարզչական շտաբը և ֆուտբոլիստները հանդես են եկել համատեղ հայտարարությամբ՝ ներողություն խնդրելով բոլոր երկրպագուներից՝ երեկվա խաղում 9-0 հաշվով խոշոր պարտության համար:

Հայտարարությունը ներկայացնում ենք ստորև.

«Հարգելի երկրպագուներ,

Հայաստանի ազգային հավաքականը ցավոտ պարտություն կրեց Նորվեգիայի ընտրանու դեմ խաղում:

Չնայած հանդիպումը ընկերական բնույթ էր կրում, այդուհանդերձ, այս պարտությանը չկա ոչ մի արդարացում:

Վստահեցնում ենք ձեզ, որ շատ կարճ ժամանակահատվածում միասին կվերլուծենք տեղի ունեցածը, կանենք համապատասխան հետևություններ, և Հայաստանի ազգային հավաքականն արդեն հունիսին՝ Ազգերի Լիգայի խաղարկության մեկնարկին, կրկին կներկայանա մարտական տեսքով:

Ունենք մեկ նպատակ՝ հայտնվել Եվրո-2024-ի եզրափակիչ փուլում: Այդ նպատակին հասնելու համար ՀՖՖ-ն, հավաքականի ֆուտբոլիստները և մարզչական շտաբը կներդնեն առավելագույն ջանքեր:

Ներողություն ենք խնդրում բոլոր երկրպագուներից՝ այս արդյունքի համար: Մենք միշտ եղել ենք միասնական ինչպես հաղթանակներից, այնպես էլ պարտություններից հետո:

Հուսով ենք, որ մոտ ապագայում Հայաստանի ազգային հավաքականն իր խաղով կրկին ուրախություն կպարգևի մեր ընտրանու բազմահազար երկրպագուներին»:

Հիշեցնենք՝ Հայաստան-Նորվեգիա ընկերական խաղում Հայաստանի ազգային հավաքականը 9 անպատասխան գնդակ էր ընդունել Նորվեգիայից։ Խաղից հետո Հայաստանի ֆուտբոլի ազգային հավաքականի մարզիչ Խոակին Կապառոսը հանդես էր եկել մամուլի ասուլիսով, որի ժամանակ նա ևս ներողություն է խնդրել պարտության համար: