Ղազախստանում սպանված իրավապահների թիվը հասել է 18-ի, ևս 748-ը վիրավոր է. Ալմաթիում զանգվածային ձերբակալություններ են

Ղազախստանում անկարգությունների ժամանակ անվտանգության աշխատակիցների շրջանում զոհերի թիվը հասել է 18-ի, ևս 748-ը վիրավորվել է: Այս մասին հայտնել է երկրի ներքին գործերի նախարարությունը:

«Սպանվել է ուժային կառույցների 18 սպա, վիրավորվել՝ ներքին գործերի մարմինների 748 աշխատակից և Ազգային գվարդիայի զինվորական»,- ասվում է հաղորդագրության մեջ։

Հանրապետության նախագահ Կասիմ-Ժոմարտ Տոկաևը զգուշացրել է, որ իշխանություններն ամենախիստ միջոցները կձեռնարկեն ցուցարարների նկատմամբ, քանի որ անկարգությունների հետևանքով տուժած և սպանված իրավապահների թիվն աճում է:

Ավելի վաղ հաղորդվում էր 13 զոհի և 350 վիրավորի մասին։

Ցուցարարներն արդեն մի քանի անգամ փորձել են գրոհել վարչական շենքերն ու ոստիկանական բաժանմունքները, որոնց ընթացքում տասնյակ մարդիկ են զոհվել։

Ի դեպ, երկրում սկսվել են մասսայական ձերբակալություններ:

Ալմաթիի ոստիկանությունը բերման է ենթարկում անկարգությունների մասնակիցներին, որոնք թալանել էին տասնյակ սուպերմարկետներ ու խանութներ և զինվել։ Այս պահին (19:20), ինչպես հայտնել են Ղազախստանի ՆԳՆ-ում, մոտ 2 հազար մարդ է բերման ենթարկվել։

Հեղուկ գազի թանկացման դեմ ցույցերի մասնակիցների ստույգ թիվը մնում է անհայտ. հանրապետության գրեթե բոլոր խոշոր քաղաքներում մարդիկ դուրս են եկել փողոց, բայց ոչ ամենուր են կատաղի առճակատման մեջ մտել իրավապահների հետ։ Ամենադժվար իրավիճակը եղել է Ղազախստանի նախկին մայրաքաղաքում, որտեղ զինված ցուցարարները ջարդեր են կազմակերպել և թալանել խանութներ, գրասենյակային շենքեր և բանկեր, ծեծի ենթարկել իրավապահներին:

Այսօր առավոտյան իրավապահներին հաջողվել է ցուցարարներին ուժով դուրս բերել Հանրապետության հրապարակից, որտեղ նրանք բարիկադներ էին տեղադրում, ապա հարակից փողոցներում նրանց չեզոքացնելու օպերացիա է սկսվել:

Ականատեսները հայտնում են, որ զինված ցուցարարները, որոնք իշխանությունների կողմից ընկալվում են որպես ահաբեկիչների արտաքին հսկողության տակ գործողներ, փակում են 7-րդ հիվանդանոցի մուտքերը՝ թույլ չտալով հիվանդներին կամ բժիշկներին ներս մտնել։

Ալմաթին ներկայումս երկրի միակ քաղաքն է, որտեղ ինտերնետ կապը դեռ արգելափակված է։ Մյուս քաղաքներում իրավապահները գրեթե ամբողջությամբ իրենց հսկողության տակ են վերադարձրել հունվարի 5-ին գրավված վարչական շենքերը։

Ցուցարարների շրջանում զոհերի թիվը մնում է անհայտ, սակայն լրատվամիջոցները նշում են, որ նրանց թիվը հասնում է մի քանի տասնյակի: