Ղազինյանը 6-րդ անգամ չընտրվեց

ԱԺ պաշտպանության և անվտանգության հարցերի հանձնաժողովն արտահերթ նիստում արդեն 6-րդ անգամ քննարկում է հանձնաժողովի փոխնախագահ ընտրելու հարցը:

Ընդդիմությունը 6-րդ անգամ այդ պաշտոնում առաջադրեց «Հայաստան» դաշինքի պատգամավոր Արթուր Ղազինյանին, որի թեկնածությանն իշխանական պատգամավորները դեմ են: 

Արթուր Ղազինյանը հայտնեց, որ նիստերի ընթացքում 18 հարց է իրեն հնչել, տրվել են պատասխաններ:

«Ես բոլոր հարցերին համբերատար պատասխանել եմ, էլի պատրաստ կլինեի, եթե ամեն բան լիներ ռացիոնալության սահմաններում: Ինքնանպատակ հարցուպատասխանի ու ելույթների ես չեմ մասնակցելու, քանի որ դուք արդեն ունեք քաղաքական որոշում իմ մասով: Փոխնախագահի հարցը ձեր տիրույթում է: Չքվեարկողն էլ եք դուք, քվեարկողն էլ, հարց տվողն էլ: Այս օրակարգը սպառված է մեզ համար: Իշխանությունը չի կարող ընդդիմությանը ստիպել զիջել այս պաշտոնը»,- ասաց նա և դուրս եկավ դահլիճից: 

Հանձնաժողովի նախագահ Անդրանիկ Քոչարյանն էլ նշեց՝ իրենք չեն ուզում ընդդիմության պաշտոնը վերցնել: «Դուք արդեն ոչ թե խրամատային, այլ պարտիզանական շարժում եք սկսել»,- հայտարարեց Քոչարյանը։

Քվեարկության արդյունքում Արթուր Ղազինյանը կրկին չընտրվեց հանձնաժողովի փոխնախագահի պաշտոնում: