Պետության ղեկավարն ընդամենը 15 տարեկան էր, երբ 1993 թվականին հանդիպեց 39-ամյա ուսուցչուհուն՝ մադամ Բրիջիտ Օզիերին, Ամիենի կաթոլիկական լիցեյում՝ Լա Պրովիդենսում, որտեղ նա նաև սովորել էր նրա ավագ դստեր՝ Լորանսի հետ։
«15 տարեկանում Մակրոնն ուներ 25-ամյա երիտասարդի հասունություն»,- ավելի վաղ ասել էր նրա նախկին ֆիզկուլտուրայի ուսուցիչ Դանիել Լելյուն, որին մեջբերում է Bloomberg-ը,-«Նա նախընտրում էր խոսել ուսուցիչների հետ, այլ ոչ թե դասընկերների»։
Բրիջիտի ընտանիքը նրանց հարաբերությունների մասին իմացել է 1994 թվականի ամռանը, երբ նրանց բռնացրել են ուսուցչուհու տարեց ծնողների տան լողավազանի մոտ արևայրուք ընդունելիս, ըստ Մաել Բրունի՝ Ֆրանսիայի առաջին տիկնոջ կենսագրության՝ «Բրիջիտ Մակրոն. Կին առանց սահմանների» աշխատության։
Գերազանց ուսանողի և նրա գրականության ու դրամայի ուսուցչի միջև եղած հարաբերությունները վրդովմունքի փոթորիկ առաջացրին։ Տեղի բնակիչները անանուն նամակներ են ուղարկել Բրիջիտի ընտանիքին պատկանող շոկոլադի և մակարունի գործարան՝ դատապարտելով նրանց հարաբերությունները։
«Նրա ընկերները, որոնց հետ նա պլանավորել էր արձակուրդ գնալ, հրաժարվեցին շփվել նրա հետ»,-գրում է նա։
Էմանուելը հետագայում խոսել է իրենց վաղ սիրավեպի մասին՝ ասելով. «Մենք խոսում էինք ամեն ինչի մասին։ Եվ ես հասկացա, որ մենք միշտ ճանաչել ենք միմյանց»,-հաղորդում է Daily Mail-ը։
Այդ ժամանակ Բրիջիտն ամուսնացած էր բանկիր Անդրե-Լուի Օզիերի հետ, որի հետ նա ուներ երեք երեխա։ Բրունը գրում է, որ Օզիերը կնոջ՝ դեռահասի հանդեպ սիրահարվածության լուրը ընդունել է «ինչպես դեմքին ապտակ»։ Նրանց հետագա ամուսնալուծությունը տևեց տասը տարի։
Այդ ժամանակ Էմանուելը վերջապես լքեց Ամիենը՝ իր վերջին կուրսն անցկացնելու Փարիզի հեղինակավոր դպրոցում, բայց հեռավորությունը չսառեցրեց նրա և Բրիջիտի միջև կիրքը։
«Ես խառնաշփոթի մեջ էի», - խոստովանել է Բրիջիտը Paris Match ամսագրին տված հազվագյուտ հարցազրույցում։ «Ես ինքս ինձ ասացի, որ նա կսիրահարվի իր տարեկից մեկին։ Դա տեղի չունեցավ»։
Էմանուելը համալսարանում սկսեց ուսումնասիրել քաղաքագիտություն և միջազգային հարաբերություններ, և նրանք շարունակեցին հանդիպել։ «Մեր իսպաներենի դասից հետո ամեն ուրբաթ նա վազում էր կայարան և նստում գնացք», - ասում է Գասպար Գանզերը, որը Մակրոնի հետ սովորել է Ստրասբուրգի համալսարանում։
Զույգը վերջապես ամուսնացավ 2007 թվականի աշնանը, նույն թվականին, երբ Բրիջիտի ամուսնալուծությունը պաշտոնապես ավարտվեց։ Նա 29 տարեկան էր, Բրիջիտը՝ 54։
Հարսանիքը տեղի է ունեցել Լե Տուկե ափամերձ քաղաքի քաղաքապետարանում, նույն վայրում, որտեղ Բրիջիտն առաջին անգամ ամուսնացել էր 1974 թվականին, և որտեղ նրա ընտանիքն ուներ ամառանոց։ Բրիջիտը կարճ սպիտակ զգեստ էր հագել։ Ներկա էին նրա երեք երեխաները, ընտանիքի մյուս անդամները և Էմանուելի ծնողները։
«Ձեզանից յուրաքանչյուրը վկան է այս վերջին 13 տարիների»,-ասել է Մակրոնը կնոջը և նորաստեղծ ընտանիքին նվիրված բաժակաճառում։ «Դուք ընդունեցիք մեզ։ Դուք մեզ դարձրեցիք այն, ինչ մենք այսօր կանք… Ես ուզում եմ շնորհակալություն հայտնել ձեզ մեզ այնպիսին սիրելու համար, ինչպիսին կանք, և ուզում եմ շնորհակալություն հայտնել Բրիջիտի երեխաներին, որովհետև նրանց համար հեշտ չէր»։
Աղբյուրը՝ news.am