Մայրաքաղաքում կտեղադրվի Արտո Չաքմաքչյանի «Քայլող մարդը» քանդակը

Հյուսիսային պողոտայի՝ Աբովյան փողոցին հարող տարածքում կտեղադրվի անվանի կանադահայ քանդակագործ Արտո Չաքմաքչյանի հեղինակած «Քայլող մարդը» քանդակը: Վարպետի ստեղծագործությունները տեղադրված են աշխարհի տարբեր քաղաքների հրապարակներում ու թանգարաններում, մինչդեռ քանդակագործը միշտ երազել է իր ստեղծագործություններից մեկն ունենալ Երևանում: Դեռևս 2000-ականների սկզբին Արտո Չաքմաքչյանին խոստացել էին «Քայլող մարդը» քանդակը տեղադրել Հյուսիսային պողոտայում: Երևանի ավագանին այսօր հավանություն տվեց որոշման նախագծին: 

Արձանի ձուլման և տեղադրման ծախսերը կհոգա ՀՀ կրթության, գիտության, սպորտի ու մշակույթի նախարարությունը:

Նշենք, որ 2007թ. այն որոշված էր տեղադրել Երևանում՝ Հյուսիսային պողոտայում. վարպետին մեծ հույսերով ոգևորեցին, ճանապարհեցին Կանադա՝ խոստանալով մի քանի ամիս անց քանդակի աշխատանքները ամբողջացնելու նպատակով սպասել Հայաստանում ու այսքանով սահմանափակվեցին:

«Քայլող մարդը»  քանդակագործի նվերն էր Երևանին, որն այդպես էլ իր տեղը չգտավ քաղաքի ոչ մի անկյունում։