Մասնագետների ներգրավման խնդիր ունենք, որը կապված է ինչպես հեռավորության հետ, այնպես էլ աշխատավարձերի

ՀՀ Արագածոտմի մարզում է գտնվում Նոր Ամանոս համայնքը: Բնակչությունը հիմնականում զբաղվում է անասնապահությամբ և գյուղատնտեսությամբ: Այս ամենին զուգահեռ կարևորվում է մշակութային կյանքի աշխուժացումը, ինչը փորձում ենք անել:


Համայնքն ունի մշակութային մեծ հիշողություն՝ կապված 80-ականների վերջի հետ, երբ գործում էին բազմաթիվ մշակութային խմբեր. թատերական խումբը ներկայացումներով հանդես էր գալիս թե՛ համայնքի, թե՛ հարևան բնակավայրերի բնակիչների համար: Համայնքում կար նաև կինոդահլիճ: Այս ամենի մասին բնակիչները ժպիտով են հիշում: Լավ է մշակութային պատմություն ունենալը, սակայն ավելի կարևոր է հիմնավորապես այն վերստեղծելն ու զարգացնելը, որպեսզի այսօրվա պատանին, դպրոցականը, երիտասարդը մշակույթից կտրված չմեծանա: Համայնքում արդեն ավելի քան մեկ տարի է՝ մշակութային աշխուժությունն ինչ-որ չափով հետ է վերադարձել, համայնքի կրտսեր բնակիչները Մշակույթի տանը հաճախում եմ պարի, դհոլի, քանոնի խմբակների: Մի քանի համատեղ միջոցառումներ են կայացել, որոնք առաջին հերթին մեծ ոգեշնչման աղբյուր են հանդիսանում հենց մասնակիցների համար: Տարեցտարի համայնքապետարանի ու պետության աջակցությամբ մաս-մաս վերանորոգվում է մշակույթի տունը:

Հուսով ենք՝ տարիներ անց արդեն ամբողջովին վերանորոգված հաստատությունում կգործեն վերը նշված և այլ խմբակներ: Սակայն այսօր ավելի շատ պետք է խոսել մարտահրավերների մասին, որն ունի համայնքը: Մասնագետների ներգրավման խնդիր ունենք, որը կապված է ինչպես հեռավորության հետ, այնպես էլ աշխատավարձերի: Ունենք բազմաթիվ շնորհաշատ նկարող երեխաներ, դաշնամուրի հանդեպ մեծ հետաքրքրություն ցուցաբերողներ:

Այս հարցում բաց կողմը համայնքային մշակութային զարգացման պետական ուղղորդված քաղաքականության բացակայությունն է: Չկան հատուկ մոտեցումներ ապահովող ծրագրեր, որոնք կտան այնպիսի լուծումներ, որի դեպքում մշակութային գործունեության ոլորտը համայնքներում զգալի կլավանա: Դա նաև համայնքային կյանքը բարեփոխելուն ուղղված քայլ կլինի, որի պայմաններում համայնքի բնակիչը կտեսնի իր ու իր երեխայի ապագան հենց համայնքում: Մեծ անելիքներ ունենք, ու հույս, որ այդ ճանապարհին պետությունն ամենից առավել շահագռգռվածներից մեկը ու օժանդակողը կլինի:

Հարգանքներով` Նոր Ամանսոսի մշակույթի տուն