«Մեզ հետ ուժի լեզվով երբևէ չփորձեք խոսել». Արայիկ Հարությունյանը՝ Ալիևին

«Մենք փորձում ենք ստեղծել համերաշխության նոր մթնոլորտ եւ իրավիճակ, համերաշխությունը մեզ համար շատ կարեւոր է»:

Այս մասին ուղիղ եթերում հայտարարել է Արցախի նախագահ Արայիկ Հարությունյանը՝ անդրադառնալով Մասիս Մայիլյանի և Սամվել Բաբայանին նշանակումներին:

Նա ասել է, որ պատահական չի շեշտում համերաշխության մասին, որովհետեւ երեկ Իլհամ Ալիևն իր հերթական հայտարարություններն է կատարել.

«Իհարկե, չեմ ուզում վիրավորել, բայց քաղաքական գործչին վայել հայտարարություններ չեն եղել, մանավանդ այս հայտարարությունը՝ «Աշխարհում ուժի գործոնը առաջնային պլան է մղվում»: Այսինքն՝ ուժի միջոցով հարցի լուծման ճանապա՞րհն ես ընտրել, պարո՛ն Ալիեւ: Մենք պատրաստ ենք, պատրաստ ենք եւ ուզում եմ նաեւ վստահեցնել ձեզ, որ արդյունքները մեզ համար պարզ են. այն, ինչ ունեցել եք 1994-ին, կունենաք նաեւ այսօր: Մեզ հետ ուժի լեզվով երբեւէ չփորձեք խոսել»,-ասել է Արայիկ Հարությունյանը:

Հիշեցնենք, որ ԼՂ պաշտպանության բանակի նախկին հրամանատար Սամվել Բաբայանը նշանակվել է Արցախի անվտանգության խորհրդի քարտուղար, իսկ Մասիս Մայիլյանը կշարունակի զբաղեցնել Արցախի Հանրապետության արտաքին գործերի նախարարի պաշտոնը: