Մեծ Բրիտանիան նախազգուշացնում է կորոնավիրուսի նոր, խիստ մուտացված և պոտենցիալ վտանգավոր շտամի մասին

Բրիտանացի վարակաբանները հայտնել են կորոնավիրուսի նոր շտամի առաջացման մասին, որը պարունակում է մի շարք մուտացիաներ, որոնք այն դարձնում են ավելի դիմացկուն պատվաստանյութերի նկատմամբ, քան SARS-CoV-2-ի ցանկացած այլ գենետիկ տարբերակ:

Daily Mail-ը հայտնում է, որ  B.1.1.529 նոր շտամի սպիտակուցում հայտնաբերվել է 32 մուտացիա, դրանցից մի քանիսը միանգամից դժվարացնում են հակամարմինների հայտնաբերումը:

Մինչ օրս հայտնի է միայն 10 դեպք, երբ հայտնաբերվել է B.1.1.529 տարբերակը, վարակված մարդկանցից վերցված նմուշներից կորոնավիրուսի գենոմների վերծանման ժամանակ։ Այն առաջին անգամ մուտքագրվել է տվյալների շտեմարաններ նոյեմբերի 11-ին։ 3 դեպք է գրանցվել Բոտսվանայում, 6-ը՝ Հարավային Աֆրիկայում, ևս 1-ը՝ Հոնկոնգում, որտեղ վիրուսը հայտնաբերվել է մի տղամարդու մոտ, որն այնտեղ է ժամանել երկու շաբաթ առաջ Հարավային Աֆրիկայից:

Դեռևս չկա որևէ կոնկրետ տեղեկություն, որը ցույց կտա, որ վիրուսի նոր տարբերակը կարող է լինել հատկապես վարակիչ և ունակ է տարածվել նույնքան արագ, որքան աշխարհում գերիշխող «դելտա» շտամը: Առայժմ միայն վարկածներ են:

Լոնդոնի Կայսերական քոլեջի հետազոտող Թոմ Փիքոքն առաջինն էր, որը կոչ արեց ուշադրություն դարձնել B.1.1.529-ին: Նրա խոսքով՝ նոր շտամն ունի «իրոք սարսափելի սպիտակուցային մուտացիայի պրոֆիլ»:

«Անհավանականորեն մեծ թվով մուտացիաները հասկի սպիտակուցում ցույց են տալիս, որ դա կարող է լուրջ անհանգստության պատճառ լինել (կանխատեսում է, որ այն կշեղվի հայտնի մոնոկլոնալ հակամարմիններից շատերից)»,- գրել է Փիքոկը: Նա նշել է, որ թեև խոսքը նոր շտամով վարակման հայտնաբերված ծայրահեղ փոքր դեպքերի մասին է, սակայն այն պետք է ուշադրությամբ վերահսկվի։ Մի քանի այլ բրիտանացի փորձագետներ համաձայնել են այս տեսակետի հետ՝ ընդգծելով, որ դրա տարածման կարողությունն առանցքային դեր կխաղա նոր շտամի պոտենցիալ վտանգի որոշման հարցում:

«Վիրուսների բնույթը ենթադրում է հաճախակի և պատահական մուտացիաներ, և արտասովոր չէ, որ փոքր թվով դեպքեր ի հայտ գան, երբ կա մուտացիաների նոր շարք: Տարածման նշաններ ցույց տվող ցանկացած տարբերակ արագ գնահատվում է», – ասել է այս տարվա ապրիլին ստեղծված Մեծ Բրիտանիայի Առողջապահության անվտանգության գործակալության ներկայացուցիչ Միրա Չանդը, մեջբերում է Daily Mail-ը։

Լոնդոնի համալսարանական քոլեջի գենետիկայի ինստիտուտի տնօրեն, պրոֆեսոր Ֆրանսուա Բալոտի խոսքով՝ նոր շտամը կարող էր ձևավորվել թուլացած իմունային համակարգ ունեցող մարդու մոտ (ենթադրաբար ՄԻԱՎ/ՁԻԱՀ-ով հիվանդի մոտ, որը պատշաճ բուժում չի ստացել): Կորոնավիրուսային վարակի քրոնիկական ընթացքը, որին իմունային համակարգը չի կարողացել հաղթահարել, կարող է թույլ տալ, որ հիվանդի օրգանիզմում վիրուսը երկար ժամանակ միանգամից մեծ քանակությամբ մուտացիաներ կուտակի։