Ինչպես հայտնի է, ՀՀ ԱԳ նախարար Արարատ Միրզոյանը Ադրբեջանի և Վրաստանի ԱԳ նախարարների մասնակցությամբ Անթալիայում մասնակցել է պանելային քննարկման:
Քննարկման ժամանակ Ադրբեջանի ԱԳ նախարար Ջեյհուն Բայրամովը կրկին բարձրաձայնել է ՀՀ Սահմանադրության հետ կապված իրենց «պահանջները» և հայտնել, որ Մինսկի խումբը պետք է լուծարվի, սակայն հայկական կողմը դրան պատշաճ չի արձագանքում:
Ի պատասխան, ՀՀ ԱԳ նախարար Արարատ Միրզոյանը մանրամասն և սպառիչ պատասխան է տվել՝ նշելով.
«Նախարար Բայրամովը խոսեց շատ կոնկրետ պայմանների կամ նախապայմանների մասին: Գիտեք, Մինսկի ձևաչափի մասին է խոսքը: Մենք մի քանի անգամ արտահայտել ենք մեր պատրաստակամությունը՝ սկսել և նախաձեռնել Մինսկի ձևաչափի կառույցների լուծարման գործընթացը: Այդ կառույցները կարողեն լուծարվել այն դեպքում, երբ հակամարտություն չկա: Ուստի սա բավական հետաքրքիր հարց է. ունե՞նք արդյոք այսօր հակամարտություն, թե՞ ոչ: Գետնի վրա, փաստացի, հակամարտություն չկա, սակայն փաստաթղթերի մակարդակով չկա խաղաղության և միջպետական հարաբերությունների հաստատման մասով ստորագրված և վավերացված համաձայնագիր:
Այսպիսով, մենք կարող ենք շարունակել փիլիսոփայել այս հարցի շուրջ, բայց լուծումը մեզ համար, առնվազն մեզ համար, ակնհայտ է:
Մենք պետք է ստորագրենք համաձայնագիրը, ինստիտուցիոնալ կերպով վերջ դնենք այս հակամարտությանը, լուծարել այդ կառույցները հենց նույն օրը, եթե ցանկանում եք նույն պահին, կամ, չգիտեմ, տաս րոպե անց, կամ մի փաստաթղթից հետո մյուսը ստորագրվի: Ես նույնիսկ չեմ ասում, թե որ փաստաթուղթը պետք է առաջինը ստորագրվի:
Եկե՛ք ստորագրենք խաղաղության պայմանագիրը: Եկե՛ք ստորագրենք համատեղ դիմում ԵԱՀԿ անդամ պետություններին կամ քարտուղարությանը՝ լուծարման վերաբերյալ: Եկե՛ք ստեղծենք երկկողմ հանձնաժողով, որի մասին ես հենց նոր խոսում էի, և սկսենք բոլոր հնարավոր հարցերի քննարկումը»:
Նախարարը, հիշեցնենք, պատասխանել է ՀՀ Սահմանադրության վերաբերյալ Բայրամովի հնչեցրած դիտարկումներին ևս: Հայաստանի Սահմանադրության ներածական մասում կա հղում Անկախության հռչակագրին, սակայն Անկախության հռչակագրի միայն այն դրույթներն ունեն իրավական նշանակություն, որոնք բառացիորեն մեջբերված են Սահմանադրության տեքստում:Այս մասին հայտարարել է ՀՀ արտգործնախարար Արարատ Միրզոյանը՝ Հայաստանի, Վրաստանի և Ադրբեջանի ԱԳ նախարարների մասնակցությամբ Անթալիայում կայացած պանելային քննարկման ժամանակ:
«Ադրբեջանի մեր գործընկերներին մտահոգող նախադասությունը Հայաստանի Սահմանադրության տեքստում մեջբերված չէ։ Այսպիսով՝ աշխարհում կա միայն մեկ մարմին, որն իրավունք ունի մեկնաբանելու մեր Սահմանադրությունը, դա Հայաստանի Հանրապետության Սահմանադրական դատարանն է։
Իսկ անցած տարվա սեպտեմբերին Դատարանը եզրակացություն է տվել, որ Հայաստանի և Ադրբեջանի միջև սահմանազատումը տեղի է ունենում Ալմաթիի հռչակագրի հիման վրա, ինչը նաև նշանակում է, որ մենք այնտեղ նշված սահմաններից դուրս պահանջներ չունենք, այս սկզբունքը լիովին համապատասխանում է մեր Սահմանադրությանը, և վերջ։ Ուստի եթե հիմա ստորագրենք խաղաղության համաձայնագիրը, վավերացման ընթացքում այն կուղարկվի Սահմանադրական դատարան։ Եթե այն ևս մեկ անգամ ասի, որ փաստաթուղթը համապատասխանում է մեր Սահմանադրությանը, կհաստատվի, որ որևէ խոչընդոտ չկա։
Եթե տեսականորեն մեր Սահմանադրական դատարանն այլ բան ասի, կքննարկենք այլ հնարավորություններ: Այս հարցը քաղաքական կամքի, կողմնորոշման խնդիր է՝ արդյոք խաղաղությո՞ւն ենք կառուցում, պատրաստվո՞ւմ ենք օգտվել հնարավորություններից, թե՞ փակելու ենք գործընթացը՝ ունենալով մտահոգություններ։ Եթե կա կամք, ճանապարհ կգտնենք»,- ասել է նախարարը: