Մոլորված զինծառայողի նկատմամբ Ադրբեջանում հարուցվել է քրգործ 5 տարբեր հոդվածով, մեղադրանքներն անհեթեթություն են. ՊՆ

Ադրբեջանի գլխավոր դատախազությունը և ՊԱԾ-ը համատեղ հայտարարություն են տարածել՝ նշելով, որ մոլորված զինծառայող Գուրգեն Ալավերդյանի նկատմամբ հարուցվել է քրեական գործ 5 տարբեր հոդվածով: Այս մասին ֆեյսբուքյան իր էջում գրել է ՀՀ ՊՆ մամուլի խոսնակ Շուշան Ստեփանյանը:

«Առաջադրված բոլոր մեղադրանքներն անհեթեթություն են, իսկ ծավալված գործընթացը՝ անորակ ավանդական բեմադրություն։ ՀՀ ՊՆ-ն մշտական կապի մեջ է միջազգային կառույցների հետ և շարունակում է ինտենսիվ աշխատել ստեղծված իրավիճակի շուրջ»,- գրել է Ստեփանյանը։

Նշենք, որ բացի այդ, պաշտպանության նախարարությունը ծառայողական քննություն է իրականացնում Գուրգեն Ալավերդյանի Ադրբեջանում հայտնվելու դեպքի առթիվ:

Հիշեցնենք, որ հայ սպան մոլորվել ու դրա արդյունքում հայտնվել է ադրբեջանական կողմում օգոստոսի 22-ին: Ըստ պաշտպանության նախարարի մամուլի խոսնակ Շուշան Ստեփանյանի՝ սպա Գուրգեն Ալավերդյանը մոլորվել է հայ-ադրբեջանական սահմանին, մարտական հենակետի ստուգումների ժամանակ եղանակային անբարենպաստ պայմանների պատճառով: Թե շփման կոնկրետ որ հատվածում է դեպքը տեղի ունեցել, Հայաստանի պաշտպանական գերատեսչությունը չի մանրամասնել։