Նա չի մասնակցել պատերազմական գործողություններին. փոխոստիկանապետը՝ Քոչարյանի քարոզարշավին մասնակցած ոստիկանի մասին

«Մեր ծառայակից գործընկերը ոստիկանության համակարգ ընդունվել է 2020թ.-ի սեպտեմբերին, ներքին զորքեր։ Չի մասնակցել նույնիսկ պատերազմական գործողություններին, այն դեպքում, երբ ներքին զորքերի ողջ անձնակազմը մասնակցություն է ունեցել»:

Այսօր մամուլի ասուլիսի ժամանակ անդրադառնալով Քոչարյանի քարոզարշավին մասնակցած ու ուսադիրներից հրապարակավ հրաժարված ոստիկանին՝ ասաց փոխոստիկանապետ Արա Ֆիդանյանը:

Նրա խոսքով՝ ոստիկանությունում աշխատակիցը գոնե մեկ տարվա ավանդ պետք է ունենա, նոր կարողանա մյուս աշխատակիցներին խորհուրդներ տալ:

Ինչ վերաբերում է ուսադիրներից հրաժարվելուն, Ֆիդանյանը նշեց, որ եթե ոստիկանը գիտակցեր, թե ինչ ասել է հրաման ու ինչ ասել է դրանից հրաժարվել, առաջին քայլով ուսադիրները հանելուց հետո կդիմեր դատարան՝ իրեն տրված հրամանի օրինականությունը վիճարկելու։

Նշենք, որ Արարատի Ավշար գյուղում «Հայաստան» դաշինքի ներկայացուցիչների հետ հանդիպման ժամանակ հենց բեմի վրա ոստիկանության ծառայողներից մեկը հայտարարեց աշխատանքից դուրս գալու մասին՝ կոչ անելով իր գործընկերներին և ոստիկանության պետի պաշտոնակատարին չկատարել վարչապետի պաշտոնակատար Նիկոլ Փաշինյանի հրամանները։