Երևանի Անաստաս Միկոյան 64 հասցեում կառուցված բնակելի 6 շենքից բաղկացած համալիրի բնակիչները փաստի առջև են կանգնել։ Բնակարանները գնել են, սակայն սեփականության վկայական չեն ստացել։
«Շենքերը կառուցված են, բայց ներքին հարդարման հարցեր կան, որոնք ավարտված չեն, տարածքի կանաչապատման հետ կիսատ գործեր ևս կան։ Կիսատ է ավտոկայանատեղիների հատվածը։ Իրենք ասել են՝ վերանորոգեք, մտեք ապրեք ու շատերն այդպես էլ արել են, ապրում են, սակայն դեռ սեփականության իրավունք ոչ մի բնակիչ չունի։ Դեռ չկա Կադաստրի վկայական։ Երկու տարի առաջ այս ամենը պետք է արվեր, բայց իրենց սնանակ են հայտարարել, որ գործը չշարունակեն»,-ardarutyun.com-ի հետ զրույցում ասացին բնակիչները՝ հավելելով, որ ուզում ենք՝ շենքն իրենց հանձնեն այն տեսքով, ինչպես որ պայմանավորվել էին։
«Եվս մեկ շենք են կառուցում, բայց նման պայմանավորվածություն չի եղել»,-շեշտեցին նրանք։
«Ն ԵՎ Ս Քոնսթրաքշն» ՍՊԸ-ն Անաստաս Միկոյան 64 հասցեում 2019 թվականին ստացել է վեց 18 հարկանի շենք կառուցելու շինթույլտվություն, սակայն մինչ օրս այն շահագործման չի հանձնվել՝ չնայած բնակիչների մի մասն արդեն ապրում է այդ շենքերում։ Նախագծի ղեկավար կազմակերպությունը սնանկ է ճանաչվել բնակիչներից մեկի դատական գործից հետո: Բնակելի համալիրի բնակարանների գնորդներից Մարինե Թովմասյանը սեպտեմբերի 17-ին սնանկության հայցով դիմել է Սնանկության դատարան՝ կառուցապատող «Ն ԵՎ Ս Քոնսթրաքշն» ընկերությանը հարկադրված սնանկ ճանաչելու պահանջով: Դատարանը շատ արագ՝ շուրջ երկու ամսում, այս տարվա դեկտեմբերի 4-ին կայացրել է «Ն ԵՎ Ս Քոնսթրաքշն» ընկերությանը սնանկ ճանաչելու որոշումը։ Նշանակվել է սնանկության կառավարիչ։
Հարցի լուծումը գտնելու համար բնակիչները կդիմեն դատարան։