Որպես սննդային հավելում օգտագործով գունանյութն անվտանգ չէ

E171 անվանումով արհեստական ներկանյութը կամ տիտանի երկօքսիդը այլևս անվտանգ չի համարվում: Lenta պարբերականի փոխանցմամբ՝ նման եզրակացության են հանգել Սննդամթերքի անվտանգության եվրոպական գործակալության (EFSA) գիտնականները:

«Հաշվի առնելով առկա բոլոր գիտական հետազոտություններն ու տվյալները՝ խումբը եկել է այն եզրակացության, որ տիտանի երկօքսիդը այլևս չի կարող համարվել անվտանգ՝ որպես սննդային հավելում», – բացատրել է EFSA-ի Սննդային հավելումների և բուրավետիչների փորձագիտական խմբի նախագահ Մաջեդ Յունեսը:

Պրոֆեսորը նշել է, որ գիտնականները չեն բացառում, որ հավելանյութը գենոտոքսիկ է, այսինքն՝ կարող է վնասել ԴՆԹ-ն: Նյութը կարող է կուտակվել բջիջներում և առաջացնել քաղցկեղ: E171 հանրաճանաչ գունանյութն օգտագործվում է սննդի արդյունաբերությունում, դրա շնորհիվ ապրանքները գրավիչ տեսք են ստանում, և դրանց պահպանման ժամկետը երկարաձգվում է: Այն հանդիպում է նաև կոսմետիկայի, ներկերի և դեղամիջոցների մեջ:

Լրատվամիջոցը հիշեցնում է, որ ավելի վաղ նշվել է՝ ինչպես տարբերել վնասակար հավելանյութերով ելակը: Լավ պտուղը վատից կարելի է տարբերել հոտի և արտաքին տեսքի շնորհիվ։ Բնական ճանապարհով աճեցված ելակն ունի արտահայտված բույր և հագեցած համ, իսկ հոտ չունեցող և միևնույն ժամանակ վառ գույնով ելակը, ամենայն հավանականությամբ, ներկանյութեր է պարունակում: Բացի այդ, մեծ հատապտուղները, հավանաբար, աճեցվել են՝ օգտագործելով հորմոններ: