Որ համարի ներքո է ելույթ ունենալու «Մանկական Եվրատեսիլ 2021»-ին Հայաստանը ներկայացնող Մալենան

Դեկտեմբերի 19-ին Ֆրանսիայում կկայանա «Մանկական Եվրատեսիլ» միջազգային մրցույթը: Հայաստանը ելույթ կունենա իններորդը։ Մրցույթին մասնակցում է 19 երկիր: Երկրները, որոնք հանդես կգան առաջինն ու վերջինը, ընտրվել են պատահականության սկզբունքով։ Մրցույթը կբացի Գերմանիան, կեզրափակի Պորտուգալիան:

Այս մասին տեղեկանում ենք «Մանկական Եվրատեսիլի» պաշտոնական կայքից:

Պատահականության սկզբունքով է ընտրվել նաեւ, թե որ համարի ներքո հանդես կգա Ֆրանսիան․ երկրի ներկայացուցիչը ելույթ կունենա տասներեքերորդը։ Մյուս երկրների ելույթների հաջորդականությունը որոշվել է Եվրոպական հեռարձակողների միության եւ «France Télévisions»-ի կողմից՝ հետաքրքիր շոու կազմակերպելու նպատակով:

Նշենք, որ նոյեմբերի վերջից արդեն հասանելի են ներկայացուցիչների երգերը: Մալենայի երգն ու տեսահոլովակը «Յութուբ» ներբեռնելուց ընդամենը ժամեր անց մեծ արձագանք է ստացել: «Եվրատեսիլի» արտասահմանցի երկրպագուները թե՛ երգը, թե՛ տեսահոլովակը շատ են հավանել: Նրանք գրում են, որ Մալենային ֆավորիտ են համարում: Ըստ նրանց՝ սա լավագույն երգն է «Մանկական Եվրատեսիլի» պատմության մեջ, եւ Մալելան միանշանակ հաղթելու է: