Չինաստանը COVID-19-ի գենոմ է հայտնաբերել ռուսական ընկերության թռչնամսի փաթեթավորման վրա

«Չինական իշխանությունները կորոնավիրուսային վարակի գենետիկական նյութ են հայտնաբերել Ռուսաստանի «Չերկիզովո» խմբի ձեռնարկությունների թռչնամսի փաթեթավորման վրա, փետրվարի 3-ից կասեցվել է այդ ձեռնարկությունների ապրանքների մատակարարման հայտարարագրերի ընդունումը Չինաստան», – ասված է «Ռոսսելխոզնադզոր»-ի հայտարարության մեջ:

Այս մասին հայտնում է «ՌԻԱ Նովոստի» լրատվական գործակալությունը։

«Այսօր ՝ 2021 թ. փետրվարի 3-ին, ՉԺՀ գլխավոր մաքսային վարչությունը հայտարարեց, որ Գուանդունի նահանգի իշխանությունները հայտնաբերել են COVID-19-ի գենոմը Ռուսաստանի երեք ձեռնարկությունների 13 խմբաքանակների արտադրանքներում ՝ թռչնամսի և ենթամթերքների արտադրության մեջ, սերտիֆիկացված ընկերությունները գտնվում են Բրյանսկի, Վորոնեժի և Կուրսկի մարզերում և մտնում են «Չերկիզովո» խմբի մեջ», – ասվում է հաղորդագրության մեջ:

Գործակալությունը նշում է, որ, ըստ Չինաստանի օրենսդրության, փետրվարի 3-ից այդ ձեռնարկություններից ապրանքների համար ներմուծման հայտարարագրերի ընդունումը ժամանակավորապես դադարեցվում է չորս շաբաթով: Ապրանքների խմբաքանակները, որոնց փաթեթավորման վրա հայտնաբերվել է կորոնավիրուսի գենետիկական նյութը, պետք է վերադարձվեն կամ ոչնչացվեն:

««Ռոսսելխոզնադզորն» իր հերթին 2021 թվականի փետրվարի 3-ից կասեցրեց այդ ընկերությունների արտադրանքի սերտիֆիկացումը Չինաստան և սկսեց հետաքննություն: Վերահսկվող ապրանքների արտահանումը վերսկսելու հնարավորությունը կախված կլինի տրամադրվող նյութերի ամբողջականությունից և որակից», – նշվում է հաղորդագրության մեջ։

Ռուսական ծառայությունը նշում է, որ ռուսական ապրանքների վրա COVID-19-ի գենոմի հայտնաբերման քանակի աճը կարող է վկայել Չինաստանի իշխանությունների կողմից ներմուծվող սննդամթերքի մատակարարման նկատմամբ վերահսկողության ավելացման մասին:

«Ռոսսելխոզնադզորն» արդեն նախազգուշացրել է ռուս արտադրողներին, այդ թվում ՝ «Չերկիզովո» խմբին, Չինաստան արտահանվող ապրանքների և դրանց փաթեթավորման վերահսկողության ուժեղացման անհրաժեշտության մասին ՝ կորոնավիրուսային գենետիկ նյութի առկայության հայտնաբերման պատճառով», – հայտնում է վարչությունը: