Պատերազմում զոհված, հաշմանդամություն ձեռք բերած զինծառայողների 3200 երեխա ամառային հանգիստը կանցկացնի ճամբարներում

Հայաստանի ամբողջ տարածքից շուրջ 3200 երեխաներ այս տարի ամառային հանգիստը պետության հաշվին կանցկացնեն մանկական ճամբարներում:

Տվյալ նախագիծն այսօր Կառավարության նիստին ներկայացրեց ԿԳՄՍ նախարարի պաշտոնակատար Վահրամ Դումանյանը, որը հավանություն ստացավ Կառավարության կողմից:  

Վահրամ Դումանյանը հայտնեց, որ այդ նպատակով նախարարությունը հատկացրել է 335.078.400 դրամ, որի մեջ ներառված են ոչ միայն ճամբարների ծախսերն ու անձնակազմի վարձատրությունը, այլև մարզերից երեխաներին ճամբար տեղափոխելու ու հերթափոխի ավարտին տուն վերադարձնելու ճանապարհային ծախսերը։

Նախագծով նախատեսվում է գումարն ուղղել զոհված, հաշմանդամ դարձած զինծառայողների և աշխարհազորայինների, ծնողազուրկ ու uակավ ապահովված բազմազավակ ընտանիքների երեխաների ամառային հանգիստը մանկական առողջարարական ճամբարներում կազմակերպմանը: Ճամբարը նախատեսվում է կազմակերպել հետևյալ կազմակերպությունների միջոցով.

  1. «Հասմիկ ճամբար» ՍՊԸ
  2. «Արագած ճամբար» ՍՊԸ
  3. ««Հեքիաթային կիրճ» մանկական տուրիստական հանգստի կենտրոն» ՍՊԸ
  4. «ԼԱՎԱ աղբյուր» ՍՊԸ
  5. «Լուսաբաց ճամբար» առողջարարական ՍՊԸ
  6. «Հանքավանի Խոտոր ջուր առողջարան» ՍՊԸ
  7. «Գուգարք ճամբար» ՍՊԸ:

Դումանյանը նաև հայտնեց, որ ճամբարները նախատեսվում են կազմակերպել 2 հերթափոխով, 20 օր տևողությամբ, յուրաքանչյուր հերթափոխում՝ 1600 երեխա։