Պետությունը 1.4 միլիարդ դրամի չափով փոխհատուցել է մարտական գործողություններին մասնակից ուսանողների ուսման վարձը

Պետությունը փոխհատուցել է շուրջ 6300 շահառուի՝ 44-օրյա պատերազմին մասնակից ուսանողների, ամուսինների, որդիների ուսման վարձը: Ընդհանուր առմամբ փոխահատուցված գումարը կազմում է 1.4 միլիարդ դրամ:

Այս մասին այսօր հրավիրված մամուլի ասուլիսի ժամանակ ասաց ԿԳՄՍ նախարարի տեղակալ Կարեն Թռչունյանը՝ ամփոփելով բարձրագույն կրթության, միջազգային համագործակցության, սփյուռքի և երիտասարդության ոլորտներում կատարված հիմնական աշխատանքները:

Փոխհատուցվել են 2020-2021 թվականի ուսման վարձերը՝ տարբեր ուսանողների խմբերի, ինչպես նաև 2021-2022 թվականների ուսման վարձերը:

Թռչունյանի խոսքով՝ պետությունը ամեն կերպ խրախուսում է երիտասարդների ուսումը, որպեսզի հետագայում ունենա որակյալ կադրեր:

«Նախատեսում է ուսանողներին տալ նաև նպաստ, որտեղ կկարևորվեն նրանց ուսման միջին որակական գնահատականը և առաջադիմությունը: Մենք խթանում ենք կրթությունը՝ որքան լավ սովորի ուսանողը, այդքանի չափով կստանա աջակցություն: Մենք ունենք սահմանված շեմ, դա 60 տոկոսն է լինելու, բայց եթե ուսանողը լիարժեք լավ սովորի, 90 տոկոս փոխհատուցում կստանա»,- ասաց նա:

Փոխհատուցվել է նաև 2021-2022 ուս. տարվա սոցիալական տարբեր խմբերի պատկանող 5722 ուսանողի ուսման վարձ, որից 2299-ը եղել են ընտանիքի անապահովության բարձր միավորներ ունեցող, 763-ը սահմանամերձ համայնքների ուսանողների ուսման վարձը: «2209-ը մարտական գործողությունների մասնակիցների, 53 բակալավրի և կրթական ծրագրերով սովորող երկու և ավելի երեխա ունեցող ուսանողների ուսման վարձերը, 399 Ապրիլյան պատերազմին մասնակից սովորող ուսանողների ուսման վարձը»,- ասաց Թռչունյանը:

Այս առումով պետությունը ընդհանուր առմամբ հատկացրել է 1,5 միլիարդ դրամ: Փոխնախարարի խոսքով՝ փոխհատուցման ծրագրերը շարունակական բնույթ են կրում: Վստահեցնում է՝ փոխհատուցման ծրագրերից օգտվելիս ոչ մի խնդիր չի առաջանալու: