Պուտինը նշել է, որ Փաշինյանի հասցեին դավաճանության մասին հնչող մեղադրանքներն անհիմն են

ՌԴ նախագահ Վլադիմիր Պուտինը հայտարարել է, որ Շուշին հանձնելու պայմանը նախկինում բանակցային սեղանին չի եղել, հայտնում է ՌԻԱ Նովոստին:

Ըստ նրա՝ այդ հարցն առաջացել է վերջին ռազմական գործողությունների ժամանակ:

ՌԴ նախագահը նաև նշել է, որ դեռ հոկտեմբերին համոզել էր Ադրբեջանի ղեկավար Իլհամ Ալիևին դադարեցնել ռազմական գործողությունները՝ պայմանով, որ ադրբեջանցի փախստականները կարողանան վերադառնալ Շուշի, բայց հայկական կողմը դրան դեմ է եղել: Նա նաև հավելել է, որ չի հասկացել՝ ինչու է ՀՀ վարչապետ Նիկոլ Փաշինյանը հրաժարվել ընդունել այդ պայմանը:

Վլադիմիր Պուտինը նաև նշել է, որ Փաշինյանի հասցեին դավաճանության մասին հնչող մեղադրանքները որևէ հիմք չունեն:

Նրա խոսքով՝ Հայաստանում իշխանական կառույցները չեն կարող իրենց թույլ տալ, որպեսզի հասարակությունը ներսից պառակտվի:

«Նրա (Փաշինյանի) հասցեին ինչ-որ դավաճանության մեղադրանքները ոչ մի հիմք չունեն»,- «Ռոսիա 24» հեռուստաալիքի եթերում ասել է Պուտինը:

«Ինչ վերաբերում է ներքաղաքական իրավիճակին, դա մեր գործը չէ, դա Հայաստանի գործն է: Սա անկախ, ինքնիշխան պետություն է, այս պետությունն իրավունք ունի որոշելու իր ներքին գործերը այնպես, ինչպես հարկ է համարում»:

ՌԴ նախագահի խոսքով՝ մինչև հրադադարը Ղարաբաղում իրադրությունը կրիտիկական է, ամեն հարց ժամերի ընթացքում էր լուծվում, ԵԱՀԿ ՄԽ շրջանակում բանակցություններ վարելն անհնար էր ժամանակի բացակայության պատճառով:

«Եթե Հայաստանը հրաժարվեր ձեռք բերված պայմանավորվածությունից, դա երկրի համար ինքնասպանություն կլիներ»,- նշել է նա:

Պուտինը նաև հայտարարել է, որ ԼՂ հարցով պայմանավորվածությունը ձևակերպվել է մեկ օրվա մեջ, «պայքարը գնում էր ամեն բառի համար, ամեն ստորակետի»:

ԼՂ կարգավիճակի մասին ՌԴ նախագահն ասել է՝ այն վերջնականապես հստակեցված չէ, Մոսկվան պահպանում է ստատուս-քվոն:

«Եթե Հայաստանի ու Ադրբեջանի միջև նորմալ հարաբերություններ լինեն, հնարավոր կլինի լուծել նաև Ղարաբաղի կարգավիճակի հարցը»,- հավելել է նա:

Անդրադառնալով Նիկոլ Փաշինյանի՝ իշխանության գալու հանգամանքներին, Պուտինը նշել է, որ դա չի ազդել ՌԴ ու ՀՀ հարաբերությունների բնույի վրա: