ՌԴ-ն մտադիր է ԵԱՏՄ քաղաքացիներին պարտավորեցնել կենսաչափական տվյալներ հանձնել և բուժզննում անցնել

Ռուսաստանի Դաշնության կառավարությունն առաջարկում է առանց մուտքի արտոնագրի Ռուսաստան ավելի քան երեք ամսով մուտքի հնարավորություն ունեցող երկրներից միգրանտներին պարտավորեցնել կենսաչափական տվյալներ հանձնել և բուժզննում անցնել: Այս մասին հայտնում է rg.ru-ն, նշելով՝ համապատասխան օրինագիծը ներկայացվել է ՌԴ խորհրդարանի Դաշնային ժողովի ստորին պալատ՝ Պետդումա:

Նշվում է՝ խոսքը վերաբերում է Եվրասիական տնտեսական միության անդամ երկրների քաղաքացիներին։

«Կենսաչափական անձնական տվյալների միջոցով նույնականացման հնարավորության բացակայությունը էապես դժվարացնում է Ռուսաստանի Դաշնությունում մնալու անցանկալիության և երկիր մուտքը չթույլատրելու մասին որոշումների իրականացումը, ինչպես նաև հետախուզվողների հայտնաբերման աշխատանքը, որոնք առնչություն ունեն ահաբեկչական խմբավորումների հետ: Ի վերջո, օտարերկրացիները կարող են նոր անձնական տվյալներ օգտագործել ու դարձյալ մուտք գործել երկիր», – շեշտում են օրենքի նախագծի հեղինակները:

Միևնույն ժամանակ,  օրինագծով առաջարկվում է օտարերկրյա որոշ քաղաքացիների, այդ թվում՝ անգործունակներին կամ հաշմանդամներին, 18 տարեկան չլրացածներ անձանց, 65 տարեկանից բարձր տղամարդկանց և 60-ն անց կանանց, ազատել սույն ընթացակարգերի կատարումից: