Ռուբեն Հայրապետյանի նկատմամբ ոստիկանությունում նյութեր են նախապատրաստվում

SHAMSHYAN.com-ի տեղեկություններով՝ ոստիկանության կազմակերպված հանցավորության դեմ պայքարի (6-րդ) գլխավոր վարչության կոռուպցիայի և տնտեսական գործունեության դեմ ուղղված հանցագործությունների հակազդման վարչությունում նյութեր են նախապատրաստվում Հայաստանի ֆուտբոլի ֆեդերացիայի նախկին նախագահ Ռուբեն Հայրապետյանի նկատմամբ:

Ռ. Հայրապետյանը, որը «Զարգացման հայկական բանկ»-ի նախագահն է և «Զեյթունի կահույքի ֆաբրիկա» ԲԲԸ-ի փաստացի սեփականատերը, 2012-2018թթ. իր ենթակա աշխատակիցների միջոցով կազմակերպել է հանրապետության մի քանի քաղաքներում ֆուտբոլի մարզադաշտերի ու մարզադպրոցների կառուցման և վերանորոգման աշխատանքներ:

Գ. Շամշյանի տեղեկություններով՝ ոստիկանության 6-րդ գլխավոր վարչությունում տեղեկություններ են ստացվել, որ Ռ. Հայրապետյանը, դրա շրջանակում չկատարելով կամ մասնակի կատարելով պայմանագրերով և նախահաշվարկներով նախատեսված ծավալները ու կազմելով կեղծ, իրականությանը չհամապատասխանող կատարողական ակտեր, յուրացրել է առանձնապես խոշոր չափերի գումարներ:

Ոստիկանության լրատվական ծառայությունից SHANTNEWS.am-ի հետ զրույցում հաստատել են, որ Ռուբեն Հայրապետյանի հետ կապված ստացվել են որոշակի տեղեկություններ, և դեպքի առթիվ նախապատրաստվում են նյութեր:

Այլ մանրամասներ ոստիկանությունից հրաժարվեցին հաղորդել: