Ռուս տիեզերագնացը խոստացել է տիեզերքից լուսանկարել Բյուրականի աստղադիտարանը

Օրերս ԳԱԱ Վ․ Համբարձումյանի անվ. Բյուրականի աստղադիտարանը (ԲԱ) հյուրընկալել է UNISTAR ARMENIA տիեզերական թեմաներով փառատոնի մասնակիցներին, որոնց թվում էին նաև ռուս տիեզերագնացներ Անդրեյ Բաբկինը և Նիկոլայ Տիխոնովը։

Աստղադիտարանից հայտնում են, որ հյուրերը հանդիպել են աստղադիտարանի տնօրեն Արեգ Միքայելյանին, ում հետ զրույցի ժամանակ էլ Անդրեյ Բաբկինը խոստացել է տիեզերքից լուսանկարել Բյուրականի աստղադիտարանը և ուղարկել Հայաստան։

UNISTAR ARMENIA փառատոնը Հայաստանում էր համախմբել ներկայացուցիչների Հայաստանից, Ռուսաստանից, ԱՄՆ-ից, Կանադայից և Եվրոպայից։

Զեկույցներով են հանդես եկել NASA կին-տիեզերագնաց Նիկոլ Սթոթը (ԱՄՆ), տիեզերագնացներ Անդրեյ Բաբկինը և Նիկոլայ Տիխոնովը (ՌԴ), CERN ֆիզիկոսներ Իրինա Շրայբերը և Ֆրենկ Տակերը (Շվեյցարիա), Բյուրականի աստղադիտարանի տնօրեն Արեգ Միքայելյանը, Վ. Համբարձումյանի տուն-թանգարանի վարիչ Գրիգոր Բրուտեանը, NASA և Space ինժեներ Քենեթ Սմիթը (ԱՄՆ) և այլք:

Փառատոնի պատվավոր հյուրն էր խորհրդային հանրահայտ տիեզերագնաց, տիեզերական 5 թռիչքներ կատարած, ԽՍՀՄ կրկնակի հերոս Վլադիմիր Ջանիբեկովը։ Փառատոնը բարեգործական էր և ուղղված էր քաղցկեղով հիվանդ երեխաներին օգնությանը։