Սահմանադրական դատարանը հրապարակել է Քոչարյանին մեղսագրվող հոդվածը հակասահմանադրական ճանաչելու պատճառները

Սահմանադրական դատարանը հրապարակել է ՀՀ քրեական օրենսգրքի  300.1 հոդվածի Սահմանադրականության հարցով Ռոբերտ Քոչարյանի եւ Երեւան քաղաքի առաջին ատյանի ընդհանուր իրավասության դատարանի դիմումների վերաբերյալ կայացրած որոշումը: 

ՍԴ որոշման մեջ մանրամասնությամբ նկարագրված են քննության ընթացքում ինչպես դիմող եւ պատասխանող կողմերի ներկայացրած դիրքորոշումները, այնպես էլ ՄԻԵԴ-ի ու Վենետիկի հանձնաժողովի դիտարկումները խնդրո առարկա հոդվածի վերաբերյալ: 

Հիշեցնենք, որ մարտի 26-ին Սահմանադրական դատարանի նախագահ Արման Դիլանյանը հրապարակել էր որոշման եզրափակիչ մասը, ըստ որի ՀՀ քրեական օրենսգրքի 300.1 հոդվածը ճանաչվել է Սահմանադրության 78 և 79-րդ հոդվածներին հակասող եւ անվավեր։

300.1-ը այն հոդվածն է, որով սահմանադրական կարգը տապալելու համար մեղադրանք է առաջադրվել Ռոբերտ Քոչարյանին: 

78-րդ հոդվածը սահմանում է՝ «հիմնական իրավունքների և ազատությունների սահմանափակման համար ընտրված միջոցները պետք է պիտանի և անհրաժեշտ լինեն Սահմանադրությամբ սահմանված նպատակին հասնելու համար: Սահմանափակման համար ընտրված միջոցները պետք է համարժեք լինեն սահմանափակվող հիմնական իրավունքի և ազատության նշանակությանը»։

Ըստ 79-րդ հոդվածի էլ «հիմնական իրավունքները և ազատությունները սահմանափակելիս օրենքները պետք է սահմանեն այդ սահմանափակումների հիմքերը և ծավալը, լինեն բավարար չափով որոշակի, որպեսզի այդ իրավունքների և ազատությունների կրողները և հասցեատերերն ի վիճակի լինեն դրսևորելու համապատասխան վարքագիծ»: