ՍԴ նախագահին կընտրեն չորեքշաբթի օրը. նախագահ դառնալու համար անհրաժեշտ է 5 կողմ ձայն

ՍԴ նախագահ

Առաջիկա չորեքշաբթի օրը Սահմանադրական դատարանում տեղի կունենա աշխատակարգային նիստ, որի օրակարգում է նաեւ Սահմանադրական դատարանի նախագահի ու փոխնախագահի ընտրության հարցը:

Տեսականորեն ՍԴ 9 անդամներից յուրաքանչյուրը կարող է ե՛ւ ինքնաառաջադրվել, ե՛ւ առաջադրել այլ թեկնածուի: Այս պահին, մեր ունեցած տեղեկություններով, ՍԴ անդամները չեն շտապում նման որոշում կայացնելու հարցում, ավելին՝ ՀԺ-ի հետ զրույցում նույնիսկ չցանկացան ասել՝ նման մտադրություն ունե՞ն, թե՞ ոչ:

Ըստ ամենայնի՝ հենց նիստի ընթացքում էլ հայտնի կդառնա՝ ովքեր են առաջադրվում, ում են առաջադրում: «Սահմանադրական դատարանի մասին» ՀՀ օրենքի 19-րդ հոդվածի համաձայն՝ Սահմանադրական դատարանի կազմից նախագահ կարող է ընտրվել այն թեկնածուն, որը ստացել է դատավորների ընդհանուր թվի ձայների երկու երրորդը, իսկ այն դեպքում, երբ առաջադրվել է մեկ թեկնածու, ապա ընտրվում է դատավորների ընդհանուր թվի ձայների մեծամասնությամբ:

Հիշեցնենք, որ նախորդ շաբաթ Ազգային ժողովն ընտրեց ՍԴ 3 դատավորների, որով համալրվեց ՍԴ 9 հոգանոց կազմը: Ըստ Սահմանադրության՝ ՍԴ կազմը համալրվելուց հետո 10-օրյա ժամկետում պետք է ընտրվեն նախագահ եւ փոխնախագահ: ՍԴ նախագահի պաշտոնը թափուր է սահմանադրական վերջին փոփոխություններից հետո, որի արդյունքում Հրայր Թովմասյանը լքեց այդ պաշտոնը՝ դառնալով ՍԴ անդամ: Ներկայումս ՍԴ նախագահի պարտականությունները ժամանակավորապես կատարում է դատարանի ամենատարիքով դատավորը՝ Աշոտ Խաչատրյանը: