«ՍԴ-ն Հռոմի պապից կաթոլիկ գտնվեց». ՀՀ գլխավոր դատախազը` 300․1 հոդվածի չեղարկման մասին

Արթուր Դավթյանը համոզված է, որ նախաքննական մարմինն ու դատախազությունը ճիշտ են վարվել, երբ «Մարտի 1»-ի գործով մեղադրանքը որակել են Քրեական օրենսգրքի 300.1 հոդվածով։

Սահմանադրական դատարանը Հռոմի պապից ավելի կաթոլիկ գտնվեց։ ՀՀ գլխավոր դատախազ Արթուր Դավթյանն այսօր ԱԺ–ում նման կերպ գնահատեց «Մարտի 1»-ի գործով մեղադրվող նախկին պաշտոնյաներին առաջադրված Քրեական օրենսգրքի 300.1 հոդվածը հակասահմանադրական ճանաչելու որոշումը։

«Գնահատում ենք, որ նախաքննական մարմինը ճիշտ է որակել։ Այսօր էլ ենք ասում, որ ճիշտ է որակել»,– ասաց Դավթյանը։

Նա շեշտեց, որ Քրեական օրենսգրքի տվյալ հոդվածը բացառիկ է, ընդունվել է Քրեական օրենսգրքի բարեփոխման արդյունքում` Վենետիկի հանձնաժողովի դրական եզրակացությամբ։