Սեյրան Օհանյանն ու նրա կինը հրավիրվել են գլխավոր դատախազություն

Ապօրինի ծագում ունեցող գույքի բռնագանձման գործընթացի շրջանակում այսօր ՀՀ գլխավոր դատախազություն են ներկայացել ՀՀ Ազգային ժողովի ընդդիմադիր «Հայաստան» խմբակցության ղեկավար, պաշտպանության նախկին նախարար Սեյրան Օհանյանը և նրա կինը՝ Ռուզաննա Խաչատրյանը:
Դատախազությունից «Հայկական ժամանակ»-ին տեղեկացրել են ՝պաշտպանության նախկին նախարարը հրավիրվել է գործին վերաբերող վարույթի նյութերին ծանոթանալու, դիրքորոշում հայտնելու նպատակով:
Դիտարկմանը, որ Օհանյանի կինը ֆեյսբուքյան գրառում էր արել՝ նշելով, որ իր անունով որևէ անշարժ գույք կալանավորված չէ, քանի որ իր անունով անշարժ գույք գոյություն չունի, դատախազությունից նշել են. «Ծանոթանալու գործընթացը շարունակվում է, այս պահին ավելին չեմ կարող ասել»:
Հարցին՝ իսկ Սերժ Սարգսյանի թիկնազորի նախկին պետ Վաչագան Ղազարյանը և նրա կինը հրավիրվե՞լ են դատախազություն, Գոռ Աբրահամյանը դրական պատասխան տվեց՝ նշելով, որ նրանք ներկայացուցչի միջոցով են իրացրել իրենց այդ իրավունքը:
Հիշեցնենք՝ դեկտեմբերի 8-ին հայտնի դարձավ, որ ապօրինի ծագում ունեցող գույքի բռնագանձման գործընթացի շրջանակում կալանք է դրվել Սեյրան Օհանյանի, նրա կնոջ, Սերժ Սարգսյանի թիկնազորի նախկին պետի և նրանց մերձավորների գույքի վրա:
Նշենք, որ ապօրինի գույքի բռնագանձման վերաբերյալ արդեն իսկ երկու գործ է ուղարկվել դատարան: Մեկն առնչվում է նախկին ոստիկանապետ Վլադիմիր Գասպարյանին և նրա մերձավորներին, իսկ մյուսը՝ ԱԱԾ նախկին բարձրաստիճան պաշտոնյա Սերոբ Հարությունյանին և նրա մերձավորներին։