Սերբիայի վարչապետը հայտարարել է պետական հեղաշրջման փորձի մասին

Սերբիայի վարչապետ Անա Բրնաբիչը նախագահ Ալեքսանդր Վուչիչի ապօրինի գաղտնալսումը որակել է որպես հեղաշրջման փորձ։ Նրա խոսքերով՝ դրանում ներգրավված են իշխող կուսակցության գործիչները և ՆԳՆ բարձրաստիճան պաշտոնյաները:

Սերբիայի ՆԳ նախարար Ալեքսանդր Վուլինը կիրակի գիշերը Անվտանգության խորհրդի նիստից հետո ասել է, որ ըստ իրավապահ մարմինների՝ պետության ղեկավարին և նրա ընտանիքի անդամներին ապօրինաբար 1 572 անգամ գաղտնալսել են։ Նախարարը պարզաբանել է, որ դրանում ներգրավված են ՆԳՆ բարձրաստիճան պաշտոնյաները, և որ գործն ու հավաքված նյութերը փոխանցվել են դատախազության վարչություն՝ կազմակերպված հանցավորության հատկանիշներով:

«Սերբիայի նախագահ Ալեքսանդր Վուչիչի գաղտնալսումը հեղաշրջման փորձ է»,- ասել է կառավարության ղեկավարը TV Pink-ի եթերում:Ըստ նրա` հետաքննությունը պետք է բացահայտի ամբողջ մեխանիզմը։

Իշխող կուսակցության փոխնախագահ, Նովի Սադի քաղաքապետ Միլոշ Վուչևիչը էլ ավելի հեռու է գնացել իր ենթադրություններով և լրագրողներին ասել, որ նախագահի դեմ դավադրությանը մասնակցողների մեջ «կան նաև նախարարներ, տնօրեններ և այլ կուսակցական գործիչներ»: Միևնույն ժամանակ, կասկածյալ պաշտոնյաների կոնկրետ անունները չեն բացահայտվել: