Սերժ Սարգսյանի` Բադեն–Բադեն այցերի վերաբերյալ նյութերն ուղարկվել են ՀՔԾ

ՀՀ գլխավոր դատախազությունը երրորդ նախագահ Սերժ Սարգսյանի` Բադեն–Բադեն այցերի վերաբերյալ հանցագործության մասին հաղորդում է ստացել, որն ուղարկել է Հատուկ քննչական ծառայություն քննության առարկա դարձնելու նպատակով: Տեղեկությունը Sputnik Արմենիային հայտնել են ՀՀ դատախազությունից։«Հանցագործության մասին հաղորդումը Հատուկ քննչական ծառայություն է ուղարկվել ՀՀ քրեական դատավարության օրենսգրքի 180-181-րդ հոդվածներով սահմանված կարգով նյութեր նախապատրաստելու հանձնարարությամբ»,– հայտնեցին դատախազությունից։

Հիշեցնենք՝ Ազգային ժողովի օգոստոսի 25-ի նիստին «Քաղաքացիական պայմանագիր» խմբակցության պատգամավոր Խաչատուր Սուքիասյանը, անդրադառնալով նախկին իշխանությունների կողմից կոռուպցիոն դրսևորումներին, հիշատակեց նաև երրորդ նախագահ Սերժ Սարգսյանին՝ պնդելով, թե վերջինս 100 մլն դոլար է տանուլ տվել Բադեն-Բադեն քաղաքում գտնվող խաղատանը։«Բոլորդ լավ գիտեք՝ երրորդ նախագահը 100 մլն դոլարից ավելի կազինոներում կրվել ա նույն Բադեն-Բադենում» – ասաց Սուքիասյանը։