Սյունիքի մարզում քաղպաշտպանության 8 հենակետ է գործելու. ԱԻ նախարար

ԱԺ «Իմ քայլը» խմբակցության պատգամավոր Արմեն Խաչատրյանն այսօր նշեց, որ շատ են այն խոսակցությունները, թե ՀՀ-ի մի շարք ապաստարաններ սեփականաշնորհված են և ԱԻ նախարար Անդրանիկ Փիլոյանից հետաքրքրվեց, թե ինչպե՞ս է եղել այդ գործընթացը, և արդյոք կա՞ ցուցակ ապաստարանների, որոնց հարցով կարող են զբաղվել համապատասխան մարմինները:

Փիլոյանը նշեց, որ ապաստարանների հաշվառում ունեն. «Եթե չեմ սխալվում, ունենք 131 ապաստարան: Դրանցից մի մասը սեփականաշնորհված է, դրանք, ավելի ճիշտ, շենքերի նկուղային հարկերն են, դրանց որոշ մասը թե՛ օրինական, թե՛ անօրինական ձևով սեփականաշնորհվել են և հիմա փակի տակ են պահվում: Պատերազմի ընթացքում տարածքային մարմիններից ամենօրյա ռեժիմով մեզ տեղեկատվություն է եկել, թե ինչքան ապաստարաններ ու շենքերի նկուղային հատվածներ են մաքրվել»:

Փիլոյանն ընդգծեց, որ ապաստարանների մասով սահմանամերձ բնակավայրերում վիճակն ավելի լավ է, քան, օրինակ, Երևանում և հարակից շրջաններում:

Նախարարը հայտնեց, որ Սյունիքում լինելու է քաղպաշտպանության 8 հենակետ, մեկն արդեն սկսել է գործել Շուռնուխում. «Տավուշում նույնպես կառուցվել է հենակետ: Հետագայում հենակետերը կգործարկվեն նաև Շիկահողում, Դավիթ Բեկում, Տեղ գյուղում և ևս 4 համայնքում»:

Փիլոյանը նշեց, որ հենակետերում կլինեն առաջին անհրաժեշտության պարագաներ և դեղորայք:   

ԱԻ նախարարը հավելեց, որ ապաստարանների վայրերն իմանալու համար իրենք կազմակերպում են քաղաքացիական պատսպարման պարապմունքներ:

armtimes.com