ԱՄՆ-ում ձերբակալվել է 13 մարդ, որոնք կասկածվում են հայկական կազմակերպված հանցավոր խմբավորմանը օժանդակելու մեջ։
Նրանց ներկայացվել են լուրջ մեղադրանքներ, այդ թվում՝ սպանության փորձ, մարդու առևանգում, զենքի անօրինական պահում, բանկային և էլեկտրոնային խարդախություն, ինչպես նաև ավելի քան 80 միլիոն դոլար արժողությամբ բեռների գողություն,-հաղորդում է ABC News-ը։
Իրավապահները խուզարկություններ են անցկացրել Լոս Անջելեսի Սան Վելի թաղամասի Կաբեռնե Կորտում գտնվող տանը, ինչպես նաև Հարավային Կալիֆոռնիայի և Ֆլորիդայի այլ օբյեկտներում։
Լոս Անջելեսում ԱՄՆ դատախազ Բիլալ Ա. Էսայլիի գրասենյակի տվյալներով, գործողության ընթացքում ձերբակալվել է հայկական կազմակերպված հանցավոր խմբի 13 անդամ։
ԱՄՆ դատախազությունը նաև հայտարարել է, որ Amazon-ից գողացվել է 83 միլիոն դոլար արժողությամբ ապրանք։
Հաղորդվում է, որ իրավապահ մարմինները երեքշաբթի օրվա գործողության ընթացքում առգրավել են մոտ 100 000 դոլար կանխիկ գումար, երեք զրահապատ մեքենա և 14 միավոր հրազեն։
Ձերբակալվածների թվում են.
Արա Արթունի, 41 տարեկան, Փորթեր Ռանչից — մեղադրվում է ռեկետի շրջանակներում սպանության փորձի մեջ
Ռոբերտ Ամիրյան, 46 տարեկան, Հոլիվուդից — մեղադրվում է առևանգման մեջ (Արթունիի մրցակիցը)
Վահան Հարությունյան, 50 տարեկան, Հոլիվուդ, Ֆլորիդա — ձերբակալվել է Ֆորտ Լոդերդեյլում
Լևոն Առաքելյան, 45 տարեկան, Լաս Վեգասից — գտնվում է կալանքի տակ այլ գործերով
Իվան Բոհորկեզ, 33 տարեկան, Գարդենայից — նույնպես ձերբակալված է այլ մեղադրանքներով
Ըստ քննության վարկածի, Արթունին 2023 թվականի ամռանը պատվիրել է Ամիրյանի սպանության փորձը։ Ամիրյանն էլ ժամանակին դավադրություն է կազմակերպել իր խմբավորման անդամների հետ՝ 2023 թվականի հունիսին Արթունիի զինակիցներից մեկին առևանգելու և խոշտանգելու համար։
Դատախազությունը հայտնել է նաև, որ Արթունին և նրա խումբը Amazon ընկերությունում գրանցվել են որպես փոխադրողներ, բեռնափոխադրումների պայմանագրեր են կնքել, բայց հետո շեղվել են երթուղուց և փոխադրման ընթացքում գողացել բեռները։ Բացի այդ, նրանք իրականացրել են «կրեդիտ քարտերի գողության» սխեմա, որի դեպքում վճարումներ են ձևակերպել կեղծ ընկերությունների անունով, այնուհետև դուրս են բերել միջոցները՝ նախքան ընկերությունները կկարողանային վիճարկել գանձումները։
ԱՄՆ դատախազությունը հայտնում է, որ մեղավոր ճանաչվելու դեպքում 13 ձերբակալվածներին սպառնում է 10 տարուց մինչև ցմահ ազատազրկում։