Վազգեն Մանուկյանի նկատմամբ որպես խափանման միջոց է կիրառվել ստորագրություն՝ չհեռանալու մասին. ՔԿ

Օրենքով սահմանված կարգով՝ Վազգեն Մանուկյանը հրավիրվել է Քննչական կոմիտե և հարցաքննվել:

Նրան մեղադրանք է առաջադրվել՝ ՀՀ քրեական օրենսգրքի 301-րդ հոդվածով (իշխանությունը զավթելուն, տարածքային ամբողջականությունը խախտելուն կամ սահմանադրական կարգը բռնի տապալելուն ուղղված հրապարակային կոչերը), և որպես խափանման միջոց է կիրառվել ստորագրություն՝ չհեռանալու մասին:

Այս մասին հայտնում են ՀՀ քննչական կոմիտեի լրատվական ծառայությունից՝ նշելով, որ Մանուկյանը հրավիրվել է ՀՀ քննչական կոմիտեի հատկապես կարևոր գործերի քննության գլխավոր վարչությունում՝ 2021թ. փետրվարի 12-ին և 20-ին Ազատության հրապարակում անցկացված հանրահավաքների ժամանակ Վազգեն Մանուկյանի կողմից՝ իշխանությունը զավթելու, սահմանադրական կարգը բռնի տապալելու, բռնություն գործադրելու հրապարակային կոչեր կատարելու առերևույթ դեպքերի առթիվ քննվող քրեական գործով:

Նախաքննությունը շարունակվում է:

Վազգեն Մանուկյանը նախքան հարցաքննությունը լրագրողների հետ զրույցում նշել է, որ  չի ընդունում մեղադրանքը, որն առաջադրվել է: Հարցին՝ չի՞ համարում իր հայտարարությունները Սահմանադրության խախտում, Մանուկյանը նշեց, որ՝ ոչ և հավելեց, որ իր ասածների համար չի փոշմանել: