Վախենամ՝ թեման առնչվում է շատ բարձրաստիճան պաշտոնյաների. Փաշինյանը՝ Խծաբերդում գերեվարումների մասին

Ինչո՞ւ Հադրութի երկու գյուղերի՝ Խծաբերդի և Հին Թաղերի հետվերադարձի հարցն առ այսօր որևէ կերպ օրակարգային հարց չի դառնում։

Այսօր Ազգային ժողովում դիմելով ՀՀ վարչապետ Նիկոլ Փաշինյանին՝ հարցն ուղղեց «Պատիվ ունեմ» խմբակցության պատգամավոր Տիգրան Աբրահամյանը՝ հավելելով, որ այդ երկու գյուղերը նոյեմբերի 9-ի դրությամբ գտնվում էին հայկական վերահսկողության ներքո։

«Մոտ մեկ տարի առաջ ադրբեջանական զորքերը բռնազավթեցին Հադրութի շրջանի երկու գյուղերը, որի հետևանքով մոտ մեկ տասնյակ զոհ ունեցանք և 62 անձ գերեվարվեց»,- նշեց պատգամավորը։

ՀՀ վարչապետ Նիկոլ Փաշինյանը նկատեց՝ Հին Թաղերում 9 զինվոր մինչև վերջ կանգնել է և իր կյանքը տվել հանուն հայրենիքի։

Ի պատասխան Աբրահամյանի հարցի էլ՝ վարչապետը նշեց՝ այդ դրվագով քրեական գործ է հարուցվել:

«Ես ցանկանում եմ ցավով արձանագրել՝ փաստն այն է, որ գործով անցնող մեղադրյալներից մեկին այդպես էլ չի հաջողվել կալանավորել, որովհետև դատարանները մերժել են կալանավորման միջնորդությունը»:

ԱԺ ընդդիմադիր «Պատիվ ունեմ» խմբակցության պատգամավոր Տիգրան Աբրահամյանը Փաշինյանից հետաքրքրվեց՝ Կառավարությունն ընդունո՞ւմ է, որ ադրբեջանական քայլերը տեղի են ունեցել նոյեմբերի 9-ի եռակողմ հայտարարությունից դուրս:

«Տպավորություն է ստեղծվում զինվորական ցածր օղակների վրա այս թեման բարդել, բարդել մարդկանց վրա, որոնք այս գործողություններում այդքան էլ մեծ դերակատարություն չունեն»:

Փաշինյանն էլ վստահեցրեց՝ տպավորությունը սխալ է. «Եթե համարեինք, որ Խծաբերդի և Հին Թաղերի բռնազավթումը նոյեմբերի 9-ի հայտարարությանը համապատասխանում է, ապա իմ նշած հերոս նահատակներն այդ դիրքերում կանգնած չէին լինի։ Եթե այդ դիրքերում կանգնած են եղել, նշանակում է՝ մենք համարում ենք, որ այդ իրադրությունը չի համապատասխանել նոյեմբերի 9-ի հայտարարության դրույթներին և տրամաբանությանը։ Շատ հարցեր կան, որ կուզենայի բարձրաձայնել, բայց բազմաթիվ պատճառներով այս ամբիոնից չեմ կարող բարձրաձայնել։ Ամենևին խնդիր չկա հնարավորինս իջեցնել թեման, որովհետև վախենամ՝ այդ թեման առնչվում է շատ բարձրաստիճան պաշտոնյաների, որոնց գործողությունները կոծկելու ցանկություն չունեմ»:Նշենք, որ Հադրութի շրջանի Հին Թաղեր և Խծաբերդ գյուղերի հանձնման և 62 շիրակցիների գերեվարման գործով կալանավորվել է հրամանատարը՝ փոխգնդապետ Արսեն Ղազարյանը: