Վանեցյանը կմասնակցի արտահերթ խորհրդարանական ընտրություններին

«Հայրենիք» կուսակցությունը մասնակցելու է արտահերթ խորհրդարանական ընտրություններին: «Արմենպրես»-ի հետ զրույցում այս մասին ասել է կուսակցության մամուլի քարտուղար Սոս Հակոբյանը:

«Արթուր Վանեցյանն էլ հայտարարել է, որ եթե կայանան արտահերթ ընտրություններ, «Հայրենիք» կուսակցությունը մասնակցելու է՝ հաղթելու և Հայաստանում վերջապես կայունություն մտցնելու ու վաղվա օրակարգի մասին խոսելու նպատակով»,- ասել է նա:

Հարցին՝ հնարավո՞ր է, որ դաշինքով մասնակցեն՝ մամուլի քարտուղարն ասել է, որ երբ գործընթացը սկսվի, վարչապետը հրաժարական տա և ԱԺ-ն երկու անգամ չընտրի վարչապետ, իրենք խորհրդակցություններ կիրականացնեն ընդդիմադիր քաղաքական ուժերի հետ և կորոշեն, թե ինչպես մասնակցել:

Հիշեցնենք, ՀՀ վարչապետ  Նիկոլ Փաշինյանը այսօր հայտնեց, որ  հունիսի 20-ին Հայաստանում կանցկացվեն արտահերթ խորհրդարանական ընտրություններ։