Վարակված անձանցից նմուշներ ենք վերցրել․ նոր շտամ հայտնաբերենք՝ կտեղեկացնենք․նախարար

Առողջապահության նախարարի պաշտոնակատար Անահիտ Ավանեսյանն այսօր Կառավարության նիստից հետո լրագրողների հետ զրույցում անդրադարձավ կորոնավիրուսային հիվանդության նոր շտամներին, որոնք արդեն տարածվել են ողջ աշխարհում՝ հասնելով մեր հարևան երկրներից Ռուսաստան և Վրաստան:

Ըստ նրա՝ այդ շտամներով է պայմանավորված նաև այն, որ նախարարությունը դիմակ դնելուց հրաժարվելու որոշումը դեռևս չի կայացնում:

«Մենք մեկ ամիս առաջ հայտնել էինք, որ պատվաստված անձանց համար պետք է գնանք թեթևացումների, և բացի բացօթյա տարածքներում դիմակ կրելու արգելքից, պետք է հանեինք փակ տարածքներում դիմակ կրելու արգելքը, բայց վերջին երկու-երեք շաբաթվա ընթացքում նոր շտամների ի հայտ գալը մեզ հուշում են, որ դեռ վաղ է նման որոշում կայացնելու համար: Առայժմ «քովիդով» վարակված անձանցից նմուշներ ենք վերցրել և սեկվենավորում ենք որոշ քանակներով, եթե նոր շտամներից հայտնաբերենք, կտեղեկացնենք: Այս պահին փակ տարածքներում դիմակ կրելը կմնա պարտադիր»,- ասաց նա:

Հիշեցնենք՝ աշխարհում այժմ տարածված է կորոնավիրուսային հիվանդության 4 շտամ, որոնց ԱՀԿ-ն անվանել է ըստ հունական այբուբենի: Բրիտանական շտամը, որը տարածվեց 2020 թվականի նոյեմբերից, ստացել է «Բետա» անվանումը, 2020 թվականի դեկտեմբերին Հարավաֆրիկյան Հանրապետությունում տարածված շտամի անվանումը «Ալֆա» է, «Գամա» անվանումը ստացել է այս տարվա մայիս ամսին Բրազիլիայում հայտնաբերված բրազիլական շտամը, վերջին օրերի ընթացքում Հնդկաստանում հայտնաբերված նոր տեսակն էլ ԱՀԿ-ն անվանել է «Դելտա»: Վիրուսի «Դելտա» տեսակը տարածված է ավելի քան 90 երկրում, այդ թվում՝ Ռուսաստանում և Վրաստանում: