Տավուշի մարզպետը դատական հայց է ներկայացրել Հրանտ Բագրատյանի դեմ. պահանջում է ներողություն ու 1 դրամ

Տավուշի մարզպետ Հայկ Չոբանյանը դատական հայց է ներկայացրել նախկին վարչապետ Հրանտ Բագրատյանի դեմ:

Այս մասին ֆեյսբուքյան իր էջում գրել է մարզպետի մամուլի խոսնակ Լիլիթ Սարգսյանը՝ նշելով, որ մարզպետը պահանջում է դատարանից պարտավորեցնել պարոն Բագրատյանին հրապարակայնորեն ներողություն խնդրել, ինչպես նաև, որպես պատճառված վնասի հատուցում՝ վճարել 1 դրամ:

Հիշեցնենք՝ Տավուշից որոշ տարածքներ Ադրբեջանին հանձնելու վերաբերյալ շրջանառվող տեղեկությունները մամուլում տարածվում էին մարտի 6-ից 7-ն ընկած ժամանակահատվածում: Հրանտ Բագրատյանը «Ֆեյսբուք» սոցիալական ցանցի իր էջում գրառում էր կատարել, որ «Հենց այս պահին» ադրբեջանցի «խաղաղապահ» զինվորները չափագրումներ են կատարում Տավուշի մարզի Ազատամուտ համայնքում, նախկին Բարխուդարլիի մերձակայքում։ 

Տավուշի մարզպետարանն ու ՊՆ-ն նույն օրը հերքել էին այս տեղեկատվությունը, սակայն խուճապ, այնուամենայնիվ, եղել էր: