Տավուշի մարզպետը դատական հայց է ներկայացրել Հրանտ Բագրատյանի դեմ

Տավուշի մարզպետն այսօր լրագրողների հետ ճեպազրույցում անդրադարձավ Տավուշից որոշ տարածքներ Ադրբեջանին հանձնելու վերաբերյալ շրջանառվող տեղեկություններին, որոնք մամուլում տարածվում էին մարտի 6-ից 7-ն ընկած ժամանակահատվածում:

Նա ասաց, որ համապատասխան հայց է ներկայացրել դատարան, որ նմանատիպ տեղեկատվություն տարածողները պատասխանատվություն կրեն: «Հայցը մասնավորապես ներկայացվել է Հրանտ Բագրատյանի դեմ»:

Չոբանյանն ընդգծեց, որ սահմանների վերաբերյալ շրջանառվող տեղեկությունները բացասական ազդեցություն են ունենում ներդրումային միջավայրի վրա:

«Այս պահին ունենք կոնկրետ ներդրողներ, որոնք կասեցրել են իրենց գործունեությունը այդ լուրերի տարածման հետ կապված: Հիմա, իհարկե, մենք հավաստիացնում ենք, հավաստիացրել ենք, բայց կան ներդրողներ, որոնք Հայաստանի Հանրապետությունից դուրս են ապրում, և երկրում իրականացվող նմանատիպ պրոցեսների նկատմամբ բավականին զգայուն են: Ես կարծում եմ, որ այսօր հանրային միջավայրը և հանրային տեղեկատվության դերակատարությունը քիչ չէ, որ մենք հաջողենք կամ չհաջողենք մեր այս գործում»:

Մանրամասնելով, թե հատկապես ինչ ներդրումային ծրագրերի վրա են ազդեցություն ունեցել Տավուշի վերաբերյալ տարածող լուրերը՝ Չոբանյանն ասաց. «Ունենք շատ խոշոր ներդրումային ծրագիր անասնապահության ոլորտում՝ 4 միլիոն դոլար ընդհանուր արժողությամբ, և այդ ծրագիրը հիմա կանգնած է: Կարծես թե արդեն գտնվում ենք այդ խնդրի լուծման փուլում, բայց այս խոսակցությունների ժամանակ այդ ծրագիրը ուղղակի կանգնեցվել է: Ներդրողները ժամանակ ուզեցին, որպեսզի հասկանան՝ արդյոք իրենք վերահաստատում են իրենց մասնակցությունը, թե ոչ: 2-րդ ծրագիրը խոշոր թռչնաբուծական ծրագրի կառուցումն էր, որը ևս կանգնել է այդ պատճառով»: