Հայաստանից Էստոնիայի Տարտու քաղաք մեկնած ԿԳՄՍ նախարարության աշխատանքային խումբը հաճելի անակնկալի է եկել՝ տեղի համալսարանի թանգարանում հայտնաբերելով 13-րդ դարի շարակնոցը։ Այն Դորպատում ուսանելու տարիներին համալսարանին է նվիրել Խաչատուր Աբովյանը։
Երևանի Խաչատուր Աբովյանի տուն-թանգարանի տնօրեն Արևիկ Ստամբոլցյանը հիացած է ձեռագիր մատյանի խնամվածությամբ։ Նա բանակցություններ է վարել թանգարանի ղեկավարության հետ, և հնարավոր է, որ եկող տարի 13-րդ դարի շարակնոցը ցուցադրվի Երևանում։Դրա համար անհրաժեշտ է ստեղծել հատուկ պայմաններ։ Արևիկ Ստամբոլցյանը նշել է նաև, որ Հայաստանում հայտնաբերվել են Աբովյանին առնչվող նոր նյութեր, օրինակ՝ նրան ուղղված հայերեն, ռուսերեն և գերմաներեն նամակներ, որոնք շուտով կհրատարակվեն առանձին գրքով։