Տեղեկություն եմ ստացել, որ «Արարատցեմենտ»-ի աշխատակիցներին պարտադրում են ցույցի մասնակցել. Արթուր Սաքունց

Իրավապաշտպան, «Հելսինկյան» քաղաքացիական ասամբլեայի Վանաձորի գրասենյակի ղեկավար Արթուր Սաքունցը տեղեկություն ունի, որ «Արարատցեմենտ» ընկերության աշխատակիցներին պարտադրում են մասնակցել բողոքի ցույցերի՝ դա չանելու դեպքում սպառնալով ազատել աշխատանքից: «Երեկ ստացել եմ տեղեկատվություն, որ «Արարատցեմենտ» գործարանի, թե ֆաբրիկայի աշխատողներից պահանջում են մասնակցել բողոքի ակցիաներին, հակառակ դեպքում կազատվեն աշխատանքից: Նաև հայտնեցին, թե կան մարդիկ, որոնք սեփական դիմումով ազատվել են աշխատանքից՝ չենթարկվելով ապօրինի պահանջին: Այս տեղեկատվությունը հիմք է տալիս՝ պնդելու, որ կատարվում են խաղաղ հավաքների մարդկանց իրավունքի խախտումներ: Հատկապես կորոնավիրուսի համավարակի ռիսկերի պարագայում պետք է զերծ մնալ այնպիսի գործողություններից, որոնք կարող են վտանգի ենթարկել նաև մարդկանց առողջությունը»,- «Ֆեյսբուք»-ի իր էջում գրել է իրավապաշտպանը: Նշենք, որ «Արարատցեմենտ»-ը կապվում է ԱԺ «Բարգավաճ Հայաստան» խմբակցության ղեկավար Գագիկ Ծառուկյանի անվան հետ: