Տիգրան Մանսուրյանի ստեղծագործության պրեմիերան տեղի կունենա Իտալիայում` Դանթե Ալիգիերիի 700-ամյակին նվիրված հեղինակավոր փառատոնի շրջանակում

LOS ANGELES-CA-JANUARY 12, 2013: Composer Tigran Mansurian watches as musicians perform his music during the Dilijan Chamber Music series' 'Celebrating Mansurian' at Zipper Concert Hall of the Colburn School in downtown Los Angeles on Sunday, January 12, 2013. (Christina House / For The Times)

Հայաստանի պետական կամերային երգչախումբը իտալացի մեծ դիրիժոր Ռիկարդո Մուտիի ղեկավարությամբ գործող սիմֆոնիկ նվագախմբի հետ Ռավեննայում կայանալիք փառատոնին կկատարեն  Տիգրան Մանսուրյանի նոր ստեղծագործությունը։

Կորոնավիրուսի համավարակի դեմ պայքարի հետ կապված սահմանափակումների պատճառով երկարատև լռությունից հետո Իտալիայում այս տարի վերականգնվում են երաժշտական միջոցառումները։  Ադրիատիկ ծովի ափին` Ռավեննա քաղաքում, հուլիսին 31-րդ անգամ կկայանա օպերային և սիմֆոնիկ երաժշտության Եվրոպայի ամենահեղինակավոր փառատոներից մեկը։ Այս անգամ փառատոնը նվիրված կլինի իտալացի մեծ բանաստեղծ, մտածող, աստվածաբան և գրական իտալերենի հիմնադիրներից մեկի` Դանթե Ալիգիերիի 700-ամյակին։

Կազմակերպիչների պնդմամբ` փառատոնը կբացվի Վոլֆգանգ Ամադեուս Մոցարտի 41-րդ դո մաժոր սիմֆոնիայի (ավելի հայտնի է որպես «Յուպիտեր») հանդիսավոր և հիասքանչ կատարմամբ։

Սա կլինի առաջին մեծ երաժշտական միջոցառումը, որն ամռանը կգրավի տասնյակ հազարավոր հանդիսատեսների ամբողջ աշխարհից։

«Կերգենք դասականների մի շարք ստեղծագործություններ, որոնց թվում է նաև մեր դասական Տիգրան Մանսուրյանը իր նոր հիասքանչ աշխատանքով։ Աշնանը նոր ելույթներ են սպասվում ինչպես Իտալիայում, այնպես էլ Երևանում` նույն կազմով։ Մուտիից հանճարեղից բացի՝ այլ բան ակնկալել չարժե։ Ուրախ ենք, որ նա մեզ նկատեց, ցանկացավ համագործակցել, և կրկնակի ուրախ ենք մաեստրո Մանսուրյանի համար, ով շարունակում է մեր ազգը ներկայացնել ամբողջ աշխարհում ամենաբարձր մակարդակով»,- ասաց Հայաստանի պետական կամերային երգչախմբի գեղարվեստական ղեկավար և դիրիժոր Ռոբերտ Մլքեյանը։

Տիգրան Մանսուրյանն իր հերթին ընդգծեց ինչպես փառատոնի, այնպես էլ Դանթեի և նրա «Աստվածային կատակերգության» կարևորությունը։

«Ինչպես գիտեք, Դանթեի ստեղծագործությունը բաղկացած է երեք մասից. «Դրախտ», «Քավարան» և «Դժոխք», փառատոնի ղեկավարությունն ինձ խնդրեց երաժշտություն գրել «Քավարանի» համար։ Մաեստրո Մուտին ցանկություն հայտնեց ներկայացնել  այդ ստեղծագործությունը ինչպես Իտալիայում, այնպես էլ Երևանում, ինչը շատ է ինձ ուրախացնում», – ասաց Մանսուրյանը։

Մանսուրյանն ու Մլքեյանը համագործակցում են ավելի քան 30 տարի, սակայն Ռավեննայի փառատոնում Մուտիի նվագախմբի հետ համատեղ ելույթը կլինի առաջին անգամ։